بعد تطبيق منظومة الخصم المباشر.. إيه اللي هيحصل في رغيف العيش

لو سمعت إن عدد أرغفة العيش هيتقل أو وزن الرغيف هيتغير.. استنى!
وزارة التموين طلعت تحسم الجدل وتوضح الحقيقة الكاملة. المنظومة الجديدة اللي اسمها "الخصم المباشر" مالهاش أي تأثير على المواطن، وهتفضل تاخد نفس حصتك من العيش المدعم زي ما هي.

الوزارة أكدت إن نصيب كل فرد هيستمر 5 أرغفة يوميًا، وزن الرغيف 90 جرام، وسعره 20 قرش، من غير أي تقليل أو زيادة في الأعباء على المواطنين. 

والتغيير الجديد هدفه تنظيم التعاملات المالية بين المطاحن والمخابز وربطها إلكترونيًا، علشان تبقى المنظومة أكثر دقة ورقابة وسرعة.

كمان التموين شددت إن الدولة هي اللي بتحدد أسعار القمح والدقيق، وبالتالي مفيش مجال لرفع الأسعار أو المغالاة من المطاحن. وأكدت إن تطوير المنظومة مجرد خطوة لتنظيم الدعم، لكن حقوق المواطن في رغيف العيش المدعم هتفضل زي ما هي من غير أي تغيير.