وفر نص تمن تذكرة القطر.. اشتراكات القطار الكهربائي الخفيف توفر 50% من التذاكر
لو مشاويرك يومية للعاصمة الإدارية أو مدن شرق القاهرة وبتدفع مبالغ ضخمة في التذاكر يبقى لازم تعمل الاشتراك ده فورا لأنه هيوفرلك تقريبا نص تمن التذاكر اليومية اللي بتدفعها.
الاشتراك الشهري للقطار الكهربائي الخفيف بيقدم تخفيضات كبيرة بتوصل لـ 50% يعني لو مشوارك لحد 3 محطات هتدفع 300 جنيه بس ولو لحد 7 محطات الاشتراك بيكون بـ 500 جنيه بنسبة تخفيض 47%
أما لو أكتر من 7 محطات فالاشتراك بـ 600 جنيه وبنسبة تخفيض 42%.
والميزة الأهم إن الاشتراك بيغطيلك عدد غير محدود من الرحلات طول الشهر.
بالنسبة لأسعار التذاكر العادية من غير اشتراك فهي 10 جنيه لحد 3 محطات و15 جنيه لحد 7 محطات و20 جنيه لأكتر من 7 محطات والقطار شغال يوميا من الساعة 5 ونص الصبح لحد الساعة 11 ونص بالليل وفيه خط ساخن للشكاوى وهو 19549
القطار الخفيف بقى حلقة الوصل الأساسية بين العاصمة الإدارية ومناطق القاهرة الكبرى لأنه بيلتقي مع الخط الثالث للمترو ومحطة السوبر جيت وقطار السويس في محطة عدلي منصور وده خلى سكان كتير يسيبوا عربياتهم ويوفروا فلوسهم ووقتهم.
