الدولار قلب الطاولة من جديد.. الجنيه يتراجع والأموال الساخنة تشعل السوق

هو إيه اللي بيحصل في سوق الصرف بالظبط ؟ وليه الدولار رجع يطلع بالسرعة دي؟ وهل اللي بيحصل حركة طبيعية بسبب التوترات اللي في المنطقة ولا إحنا داخلين على موجة جديدة من ارتفاع سعر الصرف؟  والأهم إيه حكاية الأموال الساخنة وليه دخولها أو خروجها بيقلب موازين السوق في ساعات؟

النهارده الدولار واصل مكاسبه بقوة وسجل ارتفاع بأكتر من 1% وده خلى العملة الأمريكية تقرب من مستوى 51 جنيه في عدد كبير من البنوك ودي أعلى مستويات بيوصل لها من فترة بعد ما كان بيتحرك حوالين 49 جنيه لفترة طويلة والسبب الرئيسي اللي رجع يحرك السوق هو عودة التوترات الجيوسياسية في الشرق الأوسط واللي خلت المستثمرين في العالم كله يجروا على الدولار باعتباره الملاذ الآمن وقت الأزمات.

طيب إيه علاقة اللي بيحصل بره مصر بسعر الدولار عندنا ؟

الحقيقة إن أي توتر كبير في المنطقة بيخلي المستثمرين الأجانب يعيدوا حساباتهم وده اللي حصل فعلا لأن جزء من المستثمرين اللي كانوا حاطين فلوسهم في أدوات الدين المصرية بدأوا يخرجوا من السوق ودي اللي بيتقال عليها الأموال الساخنة ولما الأموال دي تخرج بيزيد الطلب على الدولار علشان المستثمر يحول أمواله ويطلع بيها بره وده بيضغط على الجنيه ويرفع سعر الدولار.

طيب يعني إيه أموال ساخنة؟

ببساطة هي استثمارات أجنبية بتدخل بسرعة علشان تستفيد من أسعار الفايدة المرتفعة في أذون وسندات الخزانة ولما الظروف تتغير أو المخاطر تزيد بتخرج بنفس السرعة وعلشان كده اسمها أموال ساخنة لأنها مش استثمارات طويلة الأجل في مصانع أو مشروعات لكنها فلوس بتتحرك بسرعة جدا حسب المكسب والمخاطرة.

وده اللي حصل فعلا بعد فترة كانت مصر بتستفيد فيها من تدفقات إيجابية دعمت الجنيه وساعدت على استقرار سوق الصرف لكن مع تجدد التوترات الإقليمية بدأت موجة خروج جديدة وده انعكس مباشرة على سعر الدولار اللي بدأ يتحرك لفوق مرة تانية وده بيوضح قد إيه الأسواق المالية بقت مرتبطة بالأحداث السياسية والعسكرية اللي بتحصل في المنطقة.

طيب هل معنى كده إن الجنيه دخل في أزمة كبيرة؟

حركة سعر الصرف حاليا مرتبطة بشكل أساسي بحركة الأموال الأجنبية والتطورات الخارجية أكتر من ارتباطها بعوامل داخلية فقط لأن أي تحسن في الأوضاع الجيوسياسية أو عودة الاستثمارات الأجنبية لأدوات الدين ممكن يخفف الضغط على الجنيه والعكس صحيح لو استمرت التوترات أو زادت المخاوف العالمية.

كمان لازم ناخد بالنا إن الدولار مش بيقوى قدام الجنيه بس لكنه ارتفع قدام عملات كتير في العالم مع زيادة الإقبال عليه وارتفاع التوقعات إن البنوك المركزية الكبرى ممكن تحافظ على أسعار فايدة مرتفعة لفترة أطول بسبب مخاطر التضخم وده بيدي الدولار قوة إضافية في الأسواق العالمية.

السؤال اللي بيسأله ناس كتير دلوقتي هو هل الدولار هيكسر مستوى 51 جنيه ولا لأ؟

الحقيقة إن حركة الدولار في الفترة الحالية هتفضل مرتبطة بأخبار المنطقة أكتر من أي وقت فات لأن المستثمر الأجنبي بيتابع المشهد لحظة بلحظة وأي تطور جديد ممكن يغير اتجاه السوق بسرعة سواء بالصعود أو بالهدوء.