الدهب ينهار والنفط بيولع.. إيه اللي بيحصل في الأسواق العالمية؟

إيه سر الهبوط المفاجئ في الدهب عالميا؟ وليه النفط انفجر في نفس الوقت؟ وهل الأسواق شايفة إن الحرب هتطول ولا المستثمرين بقوا خايفين من حاجة أكبر وهي عودة التضخم وارتفاع الفايدة؟.

الدهب  نزل لأقل مستوى ليه خلال أسبوعين بعد موجة بيع قوية بدأت من الجلسة اللي قبلها وسجل أكبر خسارة يومية بالنسبة المئوية من أكتر من شهر الذهب في المعاملات الفورية تراجع بنسبة 0 2% ووصل إلى 3993 دولار للأوقية بعد ما فقد حوالي 3% في الجلسة السابقة وفي المقابل العقود الأمريكية الآجلة للذهب تسليم أغسطس استقرت عند 4000 دولار للأوقية وده معناه إن السوق لسه بيحاول يحدد اتجاهه الحقيقي.

طيب السؤال المهم ليه الدهب نزل رغم إن المنطقة فيها تصعيد عسكري والمفروض الدهب وقت الأزمات بيبقى هو الملاذ الآمن؟

الأسواق المرة دي بصت على الصورة بشكل مختلف لأن التصعيد بين الولايات المتحدة وإيران رفع أسعار النفط بشكل كبير وبدأ يخلق مخاوف إن التضخم يرجع يطلع من جديد ولو التضخم ارتفع يبقى البنوك المركزية وعلى رأسها الاحتياطي الفيدرالي الأمريكي ممكن تأجل خفض الفايدة أو حتى تفكر في سياسة نقدية أكثر تشددا وده ضغط على الذهب لأن الفايدة المرتفعة بتخلي الاستثمار في الذهب أقل جاذبية مقارنة بالأصول اللي بتدي عائد.

وفي نفس الوقت المستثمرين كلهم مستنيين بيانات مؤشر أسعار المستهلكين في الولايات المتحدة الخاصة بشهر يونيو لأن البيانات دي هتحدد بشكل كبير الخطوة الجاية للاحتياطي الفيدرالي لو التضخم طلع أعلى من المتوقع يبقى فرص استمرار الفايدة المرتفعة هتزيد ولو التضخم هدي ممكن الأسواق ترجع تراهن على خفض الفايدة ووقتها الذهب ممكن يستعيد جزء من خسائره بسرعة.

لكن لو بصينا على سوق النفط هنلاقي الصورة مختلفة تماما لأن أسعار البترول طلعت بقوة ووصلت لأعلى مستوياتها في 4 أسابيع مع زيادة المخاوف على إمدادات الطاقة العالمية بسبب التصعيد في مضيق هرمز وده واحد من أهم الممرات البحرية اللي بيمر منها جزء ضخم من صادرات النفط العالمية وأي اضطراب فيه بيخلي الأسواق تتوقع نقص في الإمدادات وبالتالي الأسعار بتتحرك لفوق بشكل سريع.

خام برنت ارتفع حوالي 2 3% ووصل إلى 85 دولار للبرميل بينما خام غرب تكساس الأمريكي زاد بنسبة 2 4% وسجل 80 دولار للبرميل والأهم من كده إن العقود الآجلة للنفط كانت قفزت قبلها بحوالي 9% في جلسة واحدة ودي من أكبر القفزات اللي حصلت في الفترة الأخيرة وده بيعكس حجم القلق الموجود في الأسواق.

طيب ليه النفط بيتفاعل بالشكل ده؟

لأن أي تهديد لحركة الملاحة أو الإمدادات في الخليج بيخلي الشركات والمستثمرين يتوقعوا إن المعروض يقل حتى لو بشكل مؤقت وبالتالي يبدأوا يشتروا النفط قبل ما الأسعار تطلع أكتر وده اللي بيخلق موجات صعود سريعة خصوصا لما تكون الأزمة مرتبطة بمنطقة مسؤولة عن نسبة كبيرة من إنتاج وصادرات الطاقة في العالم.

اللي بيزود حالة القلق كمان إن الدولار الأمريكي وعوائد سندات الخزانة الأمريكية طلعوا هما كمان مع تصاعد التوترات وده خلق ضغوط إضافية على الذهب لأن قوة الدولار بتخلي شراء الذهب أغلى على المستثمرين اللي بيتعاملوا بعملات تانية وده بيقلل الطلب عليه حتى في أوقات الأزمات.

وفي نفس الوقت الصورة لسه مش محسومة لأن الأسواق شايفة إن الموقف في الخليج ممكن يتغير في أي لحظة ولو حصل أي تصعيد جديد أو اتأثرت حركة الشحن بشكل أكبر ممكن أسعار النفط تكمل صعودها لكن لو الأمور هديت بسرعة ممكن جزء من المكاسب دي يتبخر بنفس السرعة.

اللي بيحصل النهارده بيوضح إن الأسواق العالمية بقت بتتحرك على أكتر من عامل في نفس الوقت الذهب بيتأثر بالتضخم والفايدة والدولار والنفط بيتأثر بالإمدادات والتوترات الجيوسياسية وكل خبر جديد بيغير اتجاه المستثمرين في دقائق وعلشان كده الفترة الجاية هتفضل مليانة تقلبات لأن أي قرار سياسي أو أي بيانات اقتصادية جديدة ممكن تقلب موازين الأسواق العالمية بالكامل وتغير اتجاه الذهب والنفط في لحظات.