مصر تحصد 4.6 مليار دولار من الصادرات.. والخزينة في انتعاش
إيه اللي بيحصل في الصادرات والواردات في مصر؟ وهل فعلاً الصادرات بدأت تتحسن؟.. الأرقام الجديدة بتقول إن الصادرات المصرية حققت أداء إيجابي في شهر ديسمبر 2025، وده ساعد في زيادة تدفقات النقد الأجنبي للاقتصاد المصري، ووصلت قيمة الصادرات المصرية لحوالي 4.6 مليار دولار، وده بزيادة 6.8% مقارنة بنفس الشهر من سنة 2024.
الحقيقة أن الزيادة دي كان ليها أبطال واضحين، وفي مقدمتهم قطاع الملابس الجاهزة اللي سجل نمو كبير وصل لحوالي 19.3%، وكمان الفواكه الطازجة كان ليها دور مهم جدًا، لأن صادراتها ارتفعت بنسبة 23.8%، وده بيعكس الطلب الكبير عليها في الأسواق الخارجية.
مش بس كده.. كمان في قطاعات تانية بدأت تتحسن في التصدير زي المحضرات الغذائية والأدوية ومحضرات الصيدلة، وده مؤشر مهم أن بعض الصناعات المصرية بقت عندها قدرة أكبر على المنافسة في الأسواق العالمية، وده بيساعد في جلب عملة صعبة للبلد.
لكن الصورة مش كلها إيجابية، في المقابل، بعض السلع الاستراتيجية سجلت تراجع في الصادرات خلال نفس الفترة، ومن أبرزها الأسمدة اللي انخفضت صادراتها بنسبة حوالي 35.5%، وكمان الحديد ومنتجاته سجل تراجع كبير وصل لأكتر من 50%، بالإضافة إلى انخفاض بسيط في صادرات المنتجات البترولية مقارنة بالسنة اللي فاتت.
طيب نروح للجزء التاني من المعادلة، واللي هو الواردات، لأن الأرقام بتقول أن الواردات المصرية ارتفعت بنسبة 9.6% خلال ديسمبر 2025، ووصلت قيمتها لحوالي 9.5 مليار دولار، بعدما كانت حوالي 8.7 مليار دولار في نفس الشهر من 2024.
الزيادة دي كانت بسبب ارتفاع استيراد عدد من السلع الأساسية، وفي مقدمتها الغاز الطبيعي اللي زادت وارداته بنسبة كبيرة وصلت لـ 54.4%، وكمان القمح اللي ارتفعت وارداته بنسبة 50%، بالإضافة إلى زيادة في واردات المنتجات البترولية، وده بيوضح أن في ضغوط كبيرة لتأمين احتياجات الطاقة والغذاء في الفترة الحالية، ولكن بسبب إن الواردات زادت أسرع من الصادرات، حصل اتساع في العجز التجاري.
العجز وصل لحوالي 4.9 مليار دولار في ديسمبر 2025، مقارنة بـ 4.4 مليار دولار في نفس الشهر من العام السابق، ومع ذلك، في نقطة إيجابية ظهرت في الأرقام، وهي إن واردات بعض السلع غير الأساسية بدأت تقل.
على سبيل المثال، واردات سيارات الركوب انخفضت بنسبة 26.8%، وكمان المواد الكيماوية العضوية وغير العضوية تراجعت بنحو 18.7%، وده ممكن يكون مؤشر أن في توجه لتقليل استيراد السلع غير الضرورية، والتركيز أكتر على السلع الأساسية والمواد الخام اللي بتخدم الصناعة.
