الأوفر برايس راجع.. قفزة جنونية في أسعار العربيات
لو ناوي تشتري عربية يبقى الحق الفرصة بسرعة لأن سوق السيارات ممكن يدخل على موجة زيادات جديدة بسبب التصعيد في المنطقة
واحد من خبراء سوق السيارات حذر إن استمرار التوترات هيأثر مباشرة على الأسعار في مصر، لأن تكلفة الشحن البحري ممكن تعلى، وأسعار التأمين تزيد.
وكمان الدولار واليوان يرتفعوا وده معناه إن استيراد العربيات ومكوناتها هيبقى أغلى.. ولو حصل أي إغلاق لمضيق هرمز، أسعار النفط نفسها هتزيد، وساعتها تكلفة الإنتاج والشحن هتضغط أكتر على السوق.
الموضوع مش بس أسعار ده كمان ممكن يحصل تأخير في وصول الشحنات الجديدة أو نقص في المعروض، وساعتها ممكن نشوف رجوع “الأوفر برايس” من تاني، سواء بشكل رسمي أو غير رسمي، خلال الأسابيع الجاية.. الشركات كمان ممكن تعيد تسعير العربيات خلال شهر أو شهرين لو التكاليف فضلت تطلع.
يعني السوق مستني يشوف الأزمة هتتحل بسرعة ولا هتطول وساعتها الصورة هتبقى أوضح. السؤال بقى تشتري دلوقتي قبل أي زيادة ولا تستنى يمكن الأمور تهدى؟
