كيف تحمي البنوك حسابات العملاء؟.. شوف اللي بيحصل ورا الكواليس عشان فلوسك متتسرقش

مع كل خبر عن اختراق أو نصب بنسمعه، السؤال اللي بييجي في دماغنا فورًا: هو فلوسي في البنك في أمان فعلًا؟ ولا ممكن في لحظة تروح؟
حماية أموال العملاء بقت أولوية قصوى لكل البنوك العاملة في مصر، مش بس عشان السمعة، لأ، عشان ثقة العميل هي رأس مال أي بنك.
وعشان كده، كل ده بيتم تحت رقابة صارمة من البنك المركزي المصري اللي بيحط قواعد أمان ملزمة لكل البنوك وبيتابع تنفيذها خطوة بخطوة.
طب البنوك بتحمي فلوسنا إزاي؟
أول خط دفاع: استثمار ضخم في التكنولوجيا، البنوك بتحدث أنظمتها باستمرار، وبتستخدم جدران نارية متطورة، وأنظمة تشفير معقدة جدًا، عشان أي محاولة اختراق تبقى شبه مستحيلة.
تاني خط دفاع: فرق أمن سيبراني شغالة 24 ساعة، في كل بنك فيه متخصصين بيراقبوا أي نشاط غريب لحظة بلحظة، ومستعدين يتدخلوا فورًا لو في أي تهديد.
تالت حاجة: أنظمة ذكية لمراقبة المعاملات، دلوقتي فيه برامج بتعتمد على الذكاء الاصطناعي بتحلل سلوكك البنكي الطبيعي، يعني لو فجأة حصلت عملية غريبة، مبلغ كبير جدًا أو عملية من مكان أول مرة تستخدمه، النظام بيوقفها فورًا ويبعتلك إشعار أو يتواصل معاك للتأكد.
كمان فيه التحقق متعدد العوامل، مش بس باسورد، لأ، كود على الموبايل، أو بصمة، أو بصمة وجه، طبقات أمان فوق بعض عشان حتى لو حد عرف كلمة السر، ميقدرش يكمل العملية.
البنوك كمان دايمًا بتحذر العملاء من رسائل التصيد والمكالمات المزيفة، وبتأكد إنها عمرها ما هتطلب منك كلمة السر أو الأرقام السرية للكارت.
طب هل مفيش مخاطر خالص؟
لأ، المخاظر دايما موجود عشان المحتالين بيطوروا نفسهم دايمًا، عشان كده المسؤولية مشتركة: متضغطش على لينكات مجهولة، متشاركش بياناتك مع أي حد، ولو لاحظت أي حاجة غريبة بلّغ البنك فورًا.
فلوسك في البنك وراها منظومة حماية كبيرة جدًا، تكنولوجيا، رقابة، وتشريعات، بس أقوى طبقة أمان دايمًا هي وعيك إنت.