«نيسان» تكشف عن خطتها لإنتاج 10 آلاف عربية في مصر.. وتوطين أكثر من 50% من مكوناتها
هل توسع نيسان وإنتاج 10 آلاف عربية زيادة سنويًا هيأثر فعلًا على أسعار العربيات في السوق؟، وهل نسبة المكون المحلي اللي هتعدي 50% هتساعد في تقليل الاستيراد وتوفير عملة صعبة؟، وهل مصر تقدر تبقى مركز إقليمي حقيقي لتصدير السيارات لإفريقيا؟، وهل التوسع ده هيوفر فرص عمل جديدة للشباب؟ وهل المصانع المحلية جاهزة توفر مكونات بجودة تنافس العالمية؟
نيسان بتجهز لمفاجأة كبيرة في مصر، ومش مجرد كلام أو وعود، ده خط إنتاج جديد هيزود 10 آلاف عربية ركوب زيادة في السنة الأولى بس من تشغيله.
شركة نيسان أعلنت خطتها للتوسع في السوق المصري، بخط إنتاج جديد هيشتغل بطاقة إنتاجية تضيف 10 آلاف عربية سنويًا، والأهم من كده أن نسبة المكون المحلي في العربيات دي هتعدي 50%، يعني أكتر من نص العربية بيتعمل في مصر.
الكلام ده جه خلال اجتماع مهم جمع المهندس خالد هاشم وزير الصناعة مع مسؤولي شركة نيسان، برئاسة المهندس محمد عبد الصمد، العضو المنتدب لنيسان إفريقيا، وبحضور عدد من قيادات الوزارة والمسؤولين عن ملف الصناعة وصناعة السيارات.
الاجتماع ناقش خطة الشركة لزيادة الإنتاج، وكمان تدريب العمالة المصرية بالتعاون مع مصلحة الكفاية الإنتاجية والتدريب المهني وجهات تانية، علشان يضمنوا أن العمالة تبقى على أعلى مستوى، وقادرة تواكب التطور الصناعي والتكنولوجي في صناعة السيارات.
نيسان مش جديدة على السوق المصري، لكنها دلوقتي بتتحرك بخطة توسع واضحة، الشركة صدرت حوالي 25 ألف عربية لدول إفريقيا خلال آخر 3 سنين، ورفعت إنتاجها في السنة المالية الحالية لـ30 ألف عربية، وده خلاها في صدارة السوق المحلي.
الهدف مش بس تلبية الطلب جوه مصر، لكن كمان استخدام مصر كنقطة انطلاق للتصدير لإفريقيا، مستفيدة من موقعها الجغرافي المميز، واتفاقيات التجارة الحرة اللي بتربطها بدول كتير في القارة الإفريقية والعالم العربي وأوروبا.
مش بس وكده، مصر كمان مهتمة جدًا بصناعة السيارات، وبتعتبرها صناعة استراتيجية مهمة لمصر، لأن القطاع ده مش بس بيوفر عربيات، لكن كمان بيفتح أبواب استثمار، وبيشغل عمالة، وبيحرك صناعات تانية مغذية زي قطع الغيار والمكونات.
كمان فيه نمو ملحوظ في عدد مصانع مكونات السيارات خلال الفترة الأخيرة، لكن المطلوب أكتر هو زيادة نسبة المكون المحلي، علشان نقلل الاعتماد على الاستيراد ونوفر عملة صعبة، وفي نفس الوقت نجذب شركات عالمية أكتر أنها تنتج في مصر بدل ما تستورد.
نيسان كمان هتفتتح قريب خط إنتاج جديد هيضيف 10 آلاف عربية سنويًا، وهيعزز نسبة التصنيع المحلي لأكتر من 50%، يعني من الآخر نيسان بتوسع استثماراتها، ومصر بتحاول تتحول لمركز إقليمي لصناعة السيارات.
