5 أخطاء تضيع فلوسك من غير ما تحس.. لو عملت الحركة دي بطاقتك الائتمانية في خطر
تصحى الصبح تمسك موبايلك تلاقي رسالة بتقولك: "تم خصم 10 آلاف جنيه من بطاقتك".
وإنت أصلا نايم وماتحركتش من السرير، لا اشتريت، ولا سحبت، ولا حتى طلعت الكارت من محفظتك.
يبقى الفلوس راحت إزاي؟ خليني أقولك إن الموضوع أسهل مما تتخيل، ولو ماخدتش بالك، ممكن الدور الجاي يكون عليك.
أول غلطة ناس كتير بتقع فيها، إنهم يصوروا الكارت ويبعتوه لحد، "خد يا عم ده رقمه عشان تحجزلي".
لحظة بس.. الصورة دي فيها كل حاجة النصاب محتاجها: رقم الكارت، تاريخ الانتهاء، والكود اللي ورا، يعني عمليًا إنت سلمته مفاتيح خزنتك بإيدك.
تاني حاجة، المواقع اللي بتظهر فجأة أو لينكات شكلها غريب، خصم 70%؟ جائزة مستنياك؟
قبل ما تفرح، اسأل نفسك: هو ليه الموقع ده اسمه ملخبط؟ وليه داخل من رسالة مش من التطبيق الرسمي؟، ضغطة واحدة غلط ممكن تفتح باب سرقة بياناتك.
ولو حد كلمك وقالك: "إحنا من البنك وعايزين نأكد بياناتك"، اقفل المكالمة فورًا، مفيش بنك محترم هيطلب منك الرقم السري أو كود بيجيلك في رسالة، الكود ده معمول عشان يحميك، مش عشان تديه لحد.
وإنت بتسحب فلوس من الـATM، ماتكتبش الرقم السري كأنك بتعزف بيانو، غطي بإيدك كويس، لأن فيه أجهزة وكاميرات صغيرة ممكن تكون مركبة عشان تسرق الرقم.
وأهم خطوة؟، فعّل إشعارات أي عملية شراء أو سحب، أول ما جنيه يتحرك من حسابك، يجيلك تنبيه، السرعة هنا بتفرق جدًا.
خليك فاكر إن بطاقتك مش مجرد قطعة بلاستيك في المحفظة، دي حسابك، تعبك، وأمانك، احميها كأنك شايل فلوسك في شنطة ومحدش غيرك يمسكها.
