من أرض بور لمشروع عالمي بيحقق طفرة زراعية.. أخد شهادة من إيفاد وهيدخل ملايين الدولارات للبلد.. ازاي مشروع سيل هيقلب الصحراء لمناجم ذهب أخضر

من أرض بور لمشروع عالمي هيقلب الصحراء لمناجم ذهب أخضر.. وهيحقق طفرة زراعية مصرية وهيوظف آلاف الشباب..اخد شهادة عالمية من إيفاد وهيدخل مليارات الدولارات للبلد.

يا ترى إيه قصة المشروع ده وازاي وزارة الزراعة قدرت تحقق الانجاز ده  وليه العالم كله انبهر بيه.. تعالوا نعرف ايه الحكاية.

من «هدهد» لـ«نباتك».. تكنولوجيا الزراعة تخدم الفلاح بـ«أون لاين»

وزير الزراعة يطلق حملة قومية لحماية محصول القمح من القوارض قبل "طرد السنابل"

عمرك فكرت إزاي ممكن أرض كانت بور  ومنسية لأكتر من 30 سنة فجأة تتحول لساحة إنتاج عالمية تدخل ملايين الدولارات.

اللي بيحصل النهاردة في مصر مش مجرد مشروع زراعي ده زلزال تنموي خلى منظمة دولية بحجم إيفاد تبعت بعثة رفيعة المستوى عشان بس تنبهر وتضرب تعظيم سلام لوزارة الزراعة المصرية على مشروع سيل.

إحنا بنتكلم عن ملحمة بقيادة الوزير علاء فاروق قدرت تحول رؤية الدولة لواقع ملموس بيغير وجه الحياة في 30 قرية بـ 4 محافظات البعثة الدولية شافت بعينيها المعجزة في وادي الصعايدة ووادي النقرة بأسوان أراضي كانت بره الحسابات تماما.

النهاردة وزارة الزراعة رجعت لها الروح بسحارة وقرى كاملة ومصارف عملاقة بتخدم 3000 فدان في قريتين الأشراف والسماحة.

وده مش مجرد ري.. ده ضخ لمليارات الجنيهات في شرايين الاقتصاد القومي من خلال زيادة التصدير والعملة الصعبة.

طيب ليه العالم مبهور بيه اوي كدا وليه في اهتمام بالمشروع ده تحديدا.. ببساطة يا سيدي لأننا بنطبق الزراعة الذكية اللي بتسبق الزمن.. لغينا فكرة الاعتماد على الديزل والكهرباء الغالية ودخلنا عصر الطاقة الشمسية بـ 101 محطة طاقة بتدير منظومة الري لآلاف الأفدنة ومعاهم ثورة في تبطين 60 كيلومتر من المساقي عشان المياه توصل لآخر شبر في الأرض .

الإشادة الدولية من إيفاد ماجتش من فراغ دي جت لأنهم شافوا نموذج رائد بيوفر كل نقطة مياه وبيقلل التكاليف وبيرفع الإنتاجية لمستويات عالمية.

المبهر بجد ان الوزارة ما سابتش المزارع لوحده دي بنت مجتمعات متكاملة بنت 10 مدارس لتقليل التسرب من التعليم ووفرت وحدات صحية وقدمت أكثر من 1500 منحة للسيدات الأكثر احتياجا عشان يفتحوا مشاريع تدر عليهم دخل ثابت.. ده غير دعم 30 جمعية تعاونية بأحدث المعدات عشان يواجهوا التغيرات المناخية بقلب جامد.

مشروع سيل هو الرد القوي على أي تحدي.. إحنا مش بنزرع أرض بس إحنا بنبني إنسان وبنأهل شبابنا لسوق العمل كخبراء في التلقيح الصناعي والزراعة الحديثة وبنستثمر في المستقبل علشان نحول الريف المصري لمركز قوة اقتصادية.

الإشادة الدولية دي هي الشهادة اللي بتقول إن مصر النهاردة مش بس بتلحق بالعالم دي بتبهر العالم وبتحط معايير جديدة للتنمية المستدامة مشروع سيل هو الحلم اللي اتحقق والخير اللي جاي لمصر ملوش حدود.