انخفاض جديد للدولار.. شركة صينية تستثمر 2 مليار دولار في مصر.. وارتفاع قياسي للدهب
رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، انخفاض جديد للدولار، وشركة صينية تستثمر 2 مليار دولار في مصر، وارتفاع قياسي للدهب.
والبداية من سوق صرف العملات الأجنبية.. الدولار سجل تراجع بسيط قدام الجنيه المصري في شوية بنوك مع تعاملات النهارده.
في البنك الأهلي المصري الدولار نزل حوالي 5 قروش ووصل لنحو 47.05 جنيه للشراء و47.15 جنيه للبيع.
وفي باقي البنوك اللي شغالة في السوق المصرفي.. الدولار في بنك نكست سجل حوالي 47.35 جنيه للشراء و47.45 جنيه للبيع.
وفي بنك القاهرة وصل لنحو 47.25 جنيه للشراء و47.35 جنيه للبيع.
وسجل الدولار في بنك مصر وبنك التعمير والإسكان والبنك المصري الخليجي حوالي 47.10 جنيه للشراء و47.20 جنيه للبيع.
أما في البنك المركزي المصري الدولار سجل نحو 47.08 جنيه للشراء و47.22 جنيه للبيع.
وفي بنك SAIB وصل السعر لحوالي 47.07 جنيه للشراء و47.17 جنيه للبيع.
وفي بنك قطر الوطني الأهلي سجل نحو 47.06 جنيه للشراء و47.16 جنيه للبيع.
وكمان سجل الدولار في المصرف العربي الدولي والبنك العربي الأفريقي الدولي وبنك فيصل الإسلامي والبنك التجاري الدولي وبنك البركة ومصرف أبوظبي الإسلامي حوالي 47.05 جنيه للشراء و47.15 جنيه للبيع.
ونروح لخبر مهم.. مجموعة شينغ فا الصينية للكيماويات ناوية تضخ استثمارات بحوالي 2 مليار دولار في مصر، وده علشان تنفيذ مشروع متكامل للبحث عن خام الفوسفات واستخراجه وكمان تصنيع منتجات عالية الجودة منه,
وزير البترول كريم بدوي عقد جلسة مباحثات مع وفد برئاسة تشينغ يالي رئيس مجموعة شينغ فا
واللي بتعتبر واحدة من اكبر منتجي الكيماويات الفوسفورية في العالم، وخلال اللقاء تم استعراض الفرص الاستثمارية المتاحة في قطاع التعدين والصناعات التعدينية في مصر.
وزارة البترول والثروة المعدنية قالت في بيان صادر النهارده، ان المشروع ده ماشي مع استراتيجيتها في تطوير قطاع التعدين، وكمان مع الجهود اللي اتعملت الفترة اللي فاتت علشان النهوض بالصناعة والتوسع في صناعات القيمة المضافة من الخامات التعدينية.
مسؤولي المجموعة الصينية اكدوا اهتمامهم القوي بدخول السوق المصرية، وضخ استثمارات في مجالي التعدين والكيماويات المتخصصة.
وقالوا ان الزيارة دي خطوة مهمة لاستكشاف فرص التعاون ووضع اساس لشراكة استراتيجية تساعد على نقل خبرات فنية متطورة وتوطين صناعات مهمة جوه الاقتصاد المصري.
وكشف الوفد عن نيتهم ضخ استثمارات توصل لملياري دولار، لتنفيذ مشروع ضخم في منطقة المثلث الذهبي على 3 مراحل، يعتمد على خام الفوسفات سواء في البحث عنه واستخراجه او في الصناعات القائمة عليه.
ونروح لسوق الصاغة.. سوق الذهب في مصر والعالم شهد قفزات قياسية في الاسعار الفترة اللي فاتت، وده بسبب تقلبات الاسواق العالمية وزيادة الطلب على الذهب كملاذ امن للمستثمرين.
الذهب لسه مكمل في جذب اهتمام المواطنين والمستثمرين مع بعض، خصوصا بعد ما جرام الذهب بمختلف الاعيرة سجل مستويات تاريخية غير مسبوقة، وده بيعكس تأثير الاوضاع الاقتصادية والجيوسياسية العالمية على الاسعار المحلية.
سعر الذهب عيار 21 ارتفع حوالي 522 جنيه في اسبوع واحد بس.. بنسبة زيادة وصلت لحوالي 8.5%.
وبدأ تعاملات الاسبوع عند مستوى 6,153 جنيه للجرام، وبعدها وصل لقمة تاريخية عند 6,680 جنيه، وقفل التعاملات قريب من 6,675 جنيه، وده اعلى مستوى يسجله السوق المحلي في تاريخه.
والارتفاعات المحلية دي جاية بالتزامن مع صعود قوي للذهب عالميا، حيث المعدن النفيس بيسجل مستويات تاريخية للاسبوع التالت على التوالي، مدعوم بتصاعد التوترات الجيوسياسية العالمية، وزيادة الطلب على الذهب كملاذ امن، وتراجع الدولار وكمان ارتفاع حالة عدم اليقين في الاسواق المالية.
