مفاجآت صادمة عن مستقبل الدولار.. خلاف في الكواليس ينهي سطوة العملة الأمريكية
يا ترى الدولار هيفضل ملك النظام المالي العالمي ولا العالم بيقلب الصفحة بهدوء؟
وهل اللي اتقال في دافوس كان مجرد كلام سياسي ولا رسائل صادمة بتقول إن في تغيير كبير جاي؟ وهل التصعيد الامريكي والرد الاوروبي معناه إن حكاية القطب الواحد خلاص بتنتهي وفي عصر جديد هيبدأ؟
اللي تابع فعاليات منتدى دافوس الاقتصادي العالمي يطلع بانطباع واضح إن العالم واقف عند نقطة تحول حقيقية التوتر كان حاضر في الكلام وفي الرسائل وفي السطور اللي ما اتقالتش صراحة بس كانت مفهومة للجميع في تصدع بيكبر بين حلفاء تاريخيين وفي شكوك بتتوسع حوالين شكل النظام الاقتصادي العالمي اللي عاش لعقود طويلة تحت مظلة واحدة وعملة واحدة ونفوذ واحد.
الرسائل اللي خرجت من دافوس كانت تقيلة ومباشرة وفي قلبها موقف امريكي شديد الوضوح عنوانه حماية الاقتصاد الوطني بأي تمن الخطاب كان حاد تجاه اوروبا والسياسات الاقتصادية الاوروبية والملف التجاري رجع بقوة للواجهة وكأن العالم بيرجع خطوة لورا لمرحلة الحروب التجارية والرسوم والقيود بدل العولمة والانفتاح اللي سيطروا سنين طويلة.
لما يتقال امريكا اولا فدي مش مجرد جملة دي سياسة كاملة بتترجم في قرارات وضغوط ورسائل واضحة للشركاء قبل الخصوم وده خلق حالة من القلق في الاسواق العالمية لان اوروبا مش لاعب صغير واي تصعيد معاها معناه اهتزاز في سلاسل الامداد وفي التجارة وفي العملات وفي الثقة اللي هي اساس اي نظام مالي عالمي.
الرد الاوروبي كان اهدى في النبرة لكنه واضح في المضمون اوروبا بقت بتفكر بشكل جدي في تقليل الاعتماد والبحث عن استقلالية اقتصادية اكبر سواء في الطاقة او التجارة او حتى في النظام المالي نفسه وده فتح الباب تاني وبقوة لكلام كان بيتقال همس عن تنويع العملات وعن تقليل الاعتماد على الدولار في التجارة الدولية والاحتياطيات.
سؤال الدولار هنا بيظهر نفسه بقوة هل العملة الأمريكية لسه بلا بديل ولا العالم بدأ فعلا يدور على نظام متعدد الاقطاب عملات متعددة مراكز نفوذ مختلفة خصوصا مع توسع استخدام العملات المحلية في التبادل بين دول كبرى وصعود تكتلات اقتصادية بتحاول تبني لنفسها مسار مستقل بعيد عن الهيمنة التقليدية؟
اللي واضح إن الدولار مش هيختفي بين يوم وليلة ولا النظام الحالي هينهار فجأة لكن الواضح اكتر إن في تشققات بتظهر وفي ثقة بتتعرض لاختبارات صعبة وكل تصعيد سياسي او تجاري بيزود الشكوك ويدفع الدول والشركات والمستثمرين لإعادة حساباتهم.
الاسواق بتكره الغموض ودافوس السنة دي كان مليان رسائل غموض العالم قدام مرحلة انتقالية ممكن تطول وممكن تكون مكلفة لكن المؤكد إن شكل النظام العالمي بعد المرحلة دي مش هيكون زي قبلها والدول اللي هتستعد بدري وتنوع اختياراتها هي اللي هتقدر تمسك العصاية من النص وسط عالم بيتغير بسرعة وقواعده بتتعاد صياغتها من جديد.
