خبر سعيد من المركزي.. الدولار يواصل التراجع.. وقفزة في أسعار الدهب
رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، خبر سعيد من المركزي، والدولار يواصل التراجع، وقفزة في أسعار الدهب.
ونبدأ بخبر مفرح من البنك المركزي المصري واللي أعلن إن تحويلات المصريين العاملين بالخارج مكملة صعود قوي ومحققّة أرقام تاريخية خلال الفترة من يناير لحد نوفمبر 2025 حيث زادت بنسبة 42.5% مقارنة بنفس الفترة من السنة اللي فاتت وسجلت حوالي 37.5 مليار دولار بعد ما كانت في حدود 26.3 مليار دولار.
وعلى المستوى الشهري كمان التحويلات واصلت الارتفاع وخلال شهر نوفمبر 2025 لوحده زادت بنسبة 39.9% وسجلت حوالي 3.6 مليار دولار مقابل 2.6 مليار دولار في نوفمبر 2024 وده بيعكس استمرار ثقة المصريين بالخارج في الاقتصاد ودعمهم لبلدهم.
ونروح لسوق صرف العملات الأجنبية حيث واصل الدولار تراجعه قدام الجنيه المصري في عدد من البنوك خلال تعاملات النهارده وسجل انخفاضات تراوحت ما بين 10 و16 قرش مقارنة بأسعاره في بداية التعاملات.
وسجل سعر الدولار في البنك الأهلي المصري وبنك مصر 47.42 جنيه للشراء و47.52 جنيه للبيع بانخفاض حوالي 14 قرش لكل من سعري الشراء والبيع.
وفي البنك التجاري الدولي CIB سجل الدولار 47.46 جنيه للشراء و47.56 جنيه للبيع بتراجع حوالي 10 قروش بينما في بنك الإسكندرية وصل لـ 47.40 جنيه للشراء و47.50 جنيه للبيع بانخفاض وصل لـ 16 قرش.
وكمان تراجع سعر الدولار في بنك قناة السويس وسجل 47.48 جنيه للشراء و47.58 جنيه للبيع بانخفاض ما بين 10 و12 قرش مقارنة بأسعاره السابقة وفي بنك البركة سجل 47.40 جنيه للشراء و47.50 جنيه للبيع بتراجع وصل لحوالي 13 قرش.
ونروح لسوق الصاغة حيث شهدت أسعار الذهب في السوق المصرية النهاردة ارتفاع واضح في أسعار الجرامات مقارنة بتعاملات امبارح الختامية.
وسعر جرام الذهب عيار 24 زاد بحوالي 126 جنيه دفعة واحدة بينما عيار 21 وهو الأكثر مبيعا في الشارع المصري ارتفع بحوالي 110 جنيه وجت الزيادة دي محليا بعد الارتفاع اللي سجلته الأسعار العالمية مع عودة البورصات العالمية للعمل من جديد صباح النهارده.
الزيادة في أسعار الذهب حصلت على خلفية تطورات سياسية عالمية مهمة بعد الإعلان عن إلقاء القبض على الرئيس الفنزويلي بقرار من الرئيس الأمريكي دونالد ترامب واللي انعكس بشكل مباشر على حركة الذهب عالميا.
وبالنسبة لأسعار الذهب النهارده فسجل جرام الذهب عيار 24 حوالي 6،840 جنيه وسجل عيار 22 نحو 6،270 جنيه وعيار 21 سجل حوالي 5،985 جنيه بينما سجل عيار 18 نحو 5،130 جنيه وعيار 14 وصل لـ 3،990 جنيه وسجل سعر الجنيه الذهب حوالي 48،320 جنيه.
ونختم بتصريحات مهمة من وزير العمل محمد جبران اللي أعلن إن يوم الأربعاء الجاي الموافق 7 يناير 2026 إجازة رسمية مدفوعة الأجر بمناسبة عيد الميلاد المجيد للعاملين في شركات القطاع الخاص المخاطبين بأحكام قانون العمل رقم 14 لسنة 2025.
القرار ده بييجي تنفيذا لحكم المادة 129 من قانون العمل الجديد وكمان وفقا لقرار وزير العمل رقم 294 لسنة 2025 الخاص بتحديد الإجازات والمناسبات الرسمية اللي تعتبر إجازة بأجر كامل واللي نص بشكل واضح إن يوم 7 يناير عيد الميلاد المجيد إجازة رسمية مدفوعة الأجر للعمال.
