خزينة مصر تنتعش بـ 3.5 مليار دولار.. يا ترى جايين منين؟
يا ترى إيه حكاية الـ 3 ونص مليار دولار اللى استلمتهم الحكوم مؤخرا من صفقة علم الروم؟ وليه الصفقة دي واخدة كل الاهتمام؟ وهل الفلوس دي مجرد رقم ولا وراها حكاية اكبر واستثمار اطول نفس وتأثير مباشر على الاقتصاد والساحل الشمالي كله؟
مصر استلمت بالفعل مبلغ 3 ونص مليار دولار من شركة الديار القطرية.. ودي الذراع العقاري لصندوق الثروة السيادي القطري والمبلغ ده جاي ضمن صفقة استثمارية كبيرة خاصة بتطوير وتنمية قطعة ارض ضخمة في نطاق منطقة سملا وعلم الروم بالساحل الشمالي الغربي في محافظة مطروح ودي واحدة من اكبر مناطق التنمية المخطط لها خلال الفترة الجاية.
المبلغ اللي دخل ده يمثل الشق النقدي من الاتفاق يعني ثمن الارض كاش وده اول جزء من الصفقة وده معناه تدفق دولاري مباشر للدولة في توقيت مهم جدا خصوصا مع تركيز الحكومة على جذب استثمارات اجنبية مباشرة مش قروض ولا التزامات مستقبلية ولكن استثمار حقيقي داخل البلد وعلى الارض.
لكن الصفقة مش فلوس وبس لان الشق التاني من الاتفاق عبارة عن مقابل عيني يعني الدولة مش بس باعت ارض وخلاص لا الدولة كمان هتاخد وحدات سكنية ضمن مكونات المشروع السكني في سملا وعلم الروم والوحدات دي مستهدف من بيعها بعد الاستلام تحقيق قيمة تقترب من 1 8 مليار دولار وده رقم كبير يضاف للعائد الاجمالي من المشروع.
كمان في نقطة مهمة جدا في الاتفاق وهي ان هيئة المجتمعات العمرانية الجديدة ليها حصة تعادل 15 في المية من صافي ارباح المشروع بعد ما يتم استرداد كامل التكلفة الاستثمارية وده معناه ان الدولة شريك في الربح مش مجرد بائع ارض ودي نقلة مهمة في طريقة ادارة الاصول وتعظيم الاستفادة منها على المدى الطويل.
الصفقة دي كانت اتوقعت في نوفمبر اللي فات لما شركة الديار القطرية وقعت اتفاقية مع الحكومة المصرية لتطوير مشروع سملا وعلم الروم باستثمارات اجمالية توصل لحوالي 29 7 مليار دولار وده يوضح ان اللي دخل دلوقتي هو مجرد بداية لتدفقات اكبر خلال مراحل تنفيذ المشروع.
المشروع نفسه بيستهدف تنمية منطقة ساحلية واعدة وتحويلها لوجهة عمرانية وسياحية متكاملة وده هيخلق فرص عمل ويشجع استثمارات تكميلية ويضيف قيمة حقيقية للساحل الشمالي الغربي اللي بقى واحد من اهم محاور التنمية في مصر خلال السنوات الاخيرة.
الرسالة الاهم من الصفقة دي ان الدولة بتتحرك بمنطق مختلف بيع اصول بشكل ذكي شراكات استثمارية طويلة الاجل جذب سيولة دولارية وتحقيق مكاسب مستقبلية في نفس الوقت وده نموذج جديد بيحاول يوازن بين احتياجات الحاضر وضمانات المستقبل ويعكس رؤية اوسع لادارة ملف الاستثمار والتنمية في مصر.
