رجل المهام الصعبة.. سر ثقة السيسي في حسن عبدالله
يا ترى ايه سر ثقة الرئيس السيسي في حسن عبدالله ؟ وليه كل ما فترته في البنك المركزي تخلص يجدد فيه الثقة في مرحلة محدش ينكر إنها من أصعب المراحل اللي عدت على الاقتصاد المصري؟ وليه حسن عبدالله بقى دايما حاضر لما الملفات تبقى تقيلة والضغوط أعلى؟
حسن عبدالله جه البنك المركزي في لحظة كانت كل المؤشرات بتقول إن المهمة شبه مستحيلة ضغوط تضخم شديدة نقص في العملة الأجنبية سوق صرف محتاج انضباط وثقة مهزوزة بين المواطن والبنوك وبين المستثمر والدولة ورغم كده القيادة السياسية اختارته لأنه معروف عنه إنه رجل إدارة أزمات قبل أي حاجة تانية وده السبب الحقيقي ورا ثقة الرئيس السيسي فيه لأن السيسي في الملفات الاقتصادية بيدور دايما على اللي يقدر يشيل الشيلة مش اللي يطلع كل شوية في الإعلام.
من أول يوم استلم فيه حسن عبدالله وهو شغال على هدف واحد يرجع الاستقرار المالي والنقدي خطوة خطوة من غير قرارات شعبوية ولا حلول مؤقتة اشتغل على إعادة بناء الثقة في الجهاز المصرفي وده بان بوضوح في تحسن السيولة الدولارية وعودة التحويلات الرسمية من المصريين بالخارج بأرقام تاريخية ووصول الاحتياطي النقدي لمستويات غير مسبوقة ودي كلها مؤشرات القيادة السياسية بتبص لها كويس جدا قبل أي قرار تجديد أو تغيير.
الرئيس السيسي بيراهن على حسن عبدالله لأنه بيفهم إن السياسة النقدية مش شعارات وإن أصعب قرار ممكن يتاخد هو القرار الصح في الوقت الغلط ظاهريا لكن الصح اقتصاديا وده اللي حسن عبدالله عمله لما التزم بسياسة سعر صرف أكثر مرونة وواجه السوق بواقعه الحقيقي من غير تجميل وده ساعد على القضاء على الفجوة بين السعر الرسمي وغير الرسمي وخلى الدولار يرجع للقنوات الشرعية تاني.
كمان حسن عبدالله قدر يدير ملف التضخم بحذر شديد بالتنسيق مع الحكومة ووزارة المالية ومع إن الضغوط كانت كبيرة إلا إن المسار النزولي للتضخم بقى واضح وده كان هدف استراتيجي للرئيس لأن استقرار الأسعار بيمس حياة الناس بشكل مباشر والقيادة السياسية بتعتبره خط أحمر.
قرار الرئيس السيسي بتجديد الثقة في حسن عبدالله لمدة سنة جديدة مش قرار روتيني لكنه رسالة واضحة إن المرحلة الجاية محتاجة نفس العقلية ونفس الأسلوب ونفس الهدوء في إدارة الملفات الصعبة تشكيل مجلس إدارة البنك المركزي الجديد كمان بيدعم الرؤية دي لأنه ضم خبرات مالية ومصرفية واقتصادية متنوعة وده معناه إن القيادة السياسية عايزة بنك مركزي قوي متماسك وقادر يشتغل كفريق واحد.
الرئيس السيسي حريص دايما يقعد مع محافظ البنك المركزي لأنه عارف إن السياسة النقدية هي خط الدفاع الأول عن الاقتصاد وإن أي خلل فيها بينعكس فورا على المواطن وعلى السوق وعلى الاستثمار وحسن عبدالله أثبت إنه أهل للثقة دي لأنه اشتغل في صمت وحقق نتائج على الأرض مش وعود في الهوا.
الأكيد إن حسن عبدالله بقى رمز لمرحلة إدارة المخاطر الاقتصادية في مصر ورجل المهمات الصعبة اللي اختارته القيادة السياسية عشان يعدي بالاقتصاد من عنق الزجاجة وقرار التجديد ليه هو تأكيد إن الرهان لسه مكمل وإن الثقة دي مبنية على أفعال مش كلام.
