أسعارها نزلت 20%.. ايه اللي هيحصل في سوق العربيات خلال 2026؟
أسعار العربيات في 2025 سواء زيرو أو مستعمل حرفيا كانت لقطة نزول رهيب في الأسعار محدش كان متوقعها بعد شهور عانى فيها السوق من ارتفاعات غير مسبوقة.
وعلاء السبع، عضو شعبة السيارات باتحاد الغرف التجارية، أكد إن السوق شهد منافسة قوية جدًا بسبب توافر المعروض وتعدد الماركات، ومع الاستقرار النسبي في سعر الدولار داخل البنوك، وكمان خفض أسعار الفائدة من البنك المركزي، الحركة رجعت للسوق من جديد.
الأرقام بتقول إن تراخيص السيارات في مصر عدت 190 ألف عربية خلال 2025، ومتوقع توصل لحوالي 200 ألف عربية قبل نهاية السنة، وده رقم بيعكس تحسن واضح في السوق.
المفاجأة بقى إن أسعار السيارات نفسها انخفضت من 10 20% خلال السنة، وده بسبب تراجع سعر الدولار، واختفاء ظاهرة الأوفر برايس اللي كانت مولعة السوق، غير زيادة الإنتاج المحلي.
طيب والسنة الجاية؟
بحسب التوقعات، أسعار السيارات في 2026 ممكن تتحرك صعود أو نزول بنسبة من 3 لـ5% بس، وده مرتبط باستقرار العملة، ودخول ماركات صينية جديدة بقوة، وكمان توسع الإنتاج المحلي.
