لو عربيتك هيونداي النترا.. روح على المكان ده فورا
لو معاك هيونداي إلنترا CN7، اللي جاي يهمك جدًا وممكن يخص أمانك الشخصي.
جهاز حماية المستهلك وهيونداي في مصر أعلنوا في بيان عاجل عن عيب تصنيعي محتمل في بعض سيارات هيونداي إلنترا CN7.
الموضوع مش بسيط، لأنه متعلق بمشد أحزمة الأمان الأمامية، يعني حاجة أساسية في أمان العربية.
العيب ده موجود في عربيات إلنترا CN7 اللي اتصنعت من أغسطس 2020 لحد أبريل 2022، وشركة جي بي أوتو، الوكيل الرسمي لهيونداي في مصر، بالتعاون مع هيونداي العالمية، قرروا يعملوا حملة استدعاء رسمية للعربيات دي.
وجهاز حماية المستهلك طلب من كل أصحاب العربيات اللي داخلة ضمن الاستدعاء إنهم يتوجهوا فورًا لمراكز الخدمة المعتمدة المنتشرة في كل الجمهورية، علشان يتم تغيير مشد أحزمة الأمان الأمامية مجاني بالكامل، من غير أي مصاريف أو رسوم.
كل اللي مطلوب منك إنك تحجز مسبقًا علشان التنظيم، وده عن طريق الخط الساخن 16661، والخدمة بتتعمل وفقًا للمواصفات القياسية المعتمدة وفي وقت مناسب، من غير ما تعطل استخدام العربية.
رئيس جهاز حماية المستهلك أكد إن الإجراء ده جاي في إطار الحرص على سلامة المواطنين، وبعد ما الجهاز استلم إخطار رسمي بوجود العيب المحتمل، تم التحرك فورًا واتخاذ كل الإجراءات الاحترازية لحماية حقوق المستهلكين.
يعني .. لو عربيتك إلنترا CN7 ومن ضمن الموديلات دي، متأجلش، سلامتك أهم من أي حاجة، والاستدعاء مجاني وهدفه الأمان وبس.
