قبل ما تنقل لبيت خد بالك.. هل ينفع تاخد عداد الكهرباء معاك؟
الإثنين 15/ديسمبر/2025 - 07:00 م
ناس كتير بتسأل.. لما بننقل لبيت جديد، هل ينفع ناخد عداد الكهربا معانا؟
مرفق الكهرباء بيقولك لأ.. العداد بتاع الوحدة اللي اتعاقدت عليها بس، ومش بيتنقل لمكان تاني.
طيب الحل؟ تقدر تتنازل عن العداد للساكن الجديد.. وده بيتم بتوقيع عقد جديد باسم الشخص اللي هيستلم الوحدة.
وهيحتاج يقدم:
إثبات ملكية أو إيجار
توكيل من صاحب العداد
آخر فاتورة
إثبات إنه سدد كل المديونيات
ولو صاحب العداد الأصلي متوفي، الورثة بيقدموا إعلام وراثة وتنازل رسمي.
أما لو انت رايح تسكن في مكان مش مرخص ساعتها تقدر تركب عداد كودي مسبق الدفع.. وده بيتركب بشكل مؤقت لحد ما يتظبط وضع المبنى أو يتنفذ قرار الإزالة.
والمهم.. العداد الكودي مالوش أي حقوق قانونية في المبنى.. وكمان تقدر تقسط مقايسة العداد الكودي على 24 شهر بدون فايدة.
يعني الموضوع كله بسيط.. بس ليه قواعد لازم تتفهم.
