ثورة اللحوم تبدأ بـ"دوربر".. 6 دوافع اقتصادية تؤكد ضرورة التوسع في تربية هذه السلالة
في الوقت اللي مصر بتدور فيه على حلول حقيقية تسد الفجوة الكبيرة بين إنتاج اللحوم واستهلاكها، ظهرت سلالة “الدوربر” كخيار اقتصادي واعد بيفتح باب جديد لتربية أغنام عالية الإنتاج والجودة.
ومع الطلب المتزايد على اللحوم في السوق المصري، بدأ مستثمرين ومربين يتجهوا للسلالة دي، خصوصًا إنها مش بس قوية.. لكنها كمان أسرع في النمو وأعلى في الإنتاج، وده بيخليها واحدة من أهم السلالات المرشحة تقود "ثورة اللحوم" في مصر خلال السنين الجاية.
مصر بتستهلك حوالي مليون طن لحوم سنويًا، في حين الإنتاج المحلي حوالَي 600 ألف طن بس، يعني في فجوة كبيرة لازم تتسد خلال الفترة الجاية، وعلشان كده، الدولة والمستثمرين بيبحثوا عن سلالات قوية وقدرتها الإنتاجية عالية.. وهنا بييجي دور "أغنام الدوربر".
الدوربر أصلها من جنوب أفريقيا، واتطورت تحديدًا عشان تتحمل الحرارة، الجفاف، وقلة المراعي. وده بيخليها مناسبة جدًا لبيئة زي مصر، خصوصًا في المحافظات الصحراوية زي مطروح، السلالة دي مشهورة إنها أغنام شعرية مش صوفية، وده معناه إنها مش محتاجة جز صوف أو خدمات إضافية، فتكاليف تربيتها أقل بكتير.
الميزة الأولى والأكبر للدوربر هي سرعة النمو، السلالة دي بتكبر بمعدل أسرع من أي نوع أغنام تاني، وأوزانها بتزيد حتى مع علائق بسيطة، وده معناه دورة تربية أقصر وربحية أعلى.. وده أهم عنصر لكل مربي.
الميزة التانية إنها بتقدر تحوّل العلف للحم بكفاءة عالية، يعني كل كيلو علف تقريبًا بيطلع لحم أكتر، وده بيوفر تكلفة وبيزود الإنتاج، لما تلاقي سلالة بتأكل أقل وبتدي لحم أكتر.. طبيعي تبقى اختيار اقتصادي ممتاز.
الميزة التالتة إن خصوبتها عالية جدًا، ومعظم الولادات بيكون فيها توائم، وده بيساعد المربي إنه يضاعف قطيعه في وقت أسرع من السلالات التقليدية.
أما الميزة الرابعة فهي جودة اللحمة نفسها: لحم طري، نضيف، قليل الدهن، وطعمه مميز، وده بيخليه مطلوب وسط المستهلكين بشكل كبير.
الميزة الخامسة إنها ما بتتعبش من حرارة الجو، وده راجع لأصلها الجنوب أفريقي، فبتعيش وتتأقلم بسهولة في المناخ المصري.
الميزة السادسة إن لحوم الدوربر لها قيمة في السوق العالمي، وفي دول كتير بتستورده، وده يفتح باب تصديري كبير في المستقبل.
وبسبب كل المميزات دي، بدأ الإقبال على تربيتها يزيد في مصر، خصوصًا في المحافظات اللي عندها مساحات صحراوية كويسة للقطعان، السلالة دي مناسبة للمزارع الصغيرة والكبيرة، وده بيشجع الشباب اللي عايزين يبدأوا مشروع إنتاج حيواني بقيمة عالية ومخاطرة قليلة.
وفي سياق دعم الثروة الحيوانية بشكل عام، وزارة الزراعة أعلنت مؤخرًا عن إصدار 807 ترخيص تشغيل لمزارع وأنشطة إنتاج حيواني وداجني خلال شهر واحد بس، وده جزء من خطة الدولة لتسهيل إجراءات التراخيص وتحسين معايير الأمن الحيوي.
اللي واضح إن الفترة اللي جاية هتبقى بداية تغيير كبير في إنتاج اللحوم في مصر.. والدوربر واقفة في أول الصف، باعتبارها السلالة اللي ممكن تحقق نقلة كبيرة في الإنتاج والجودة والربحية.
