ليه أسعار الأجهزة الكهربائية ارتفعت فجأة؟.. السبب مالهوش علاقة بالدولار

عارف الأزمة اللي حصلت في أسعار الأجهزة الكهربائية اليومين دول؟.. الزيادة اللي طلعت مرة واحدة ومالهاش أي علاقة لا بدولار ولا باستيراد!

اللي حصل ببساطة إن الدولة فرضت رسوم وقائية لمدة 200 يوم على خامات أساسية.. تحديدًا الحديد والصاج اللي المصانع بتعتمد عليهم في تصنيع كل حاجة من أول التلاجة لحد الغسالة.

وبمجرد ما التكلفة على المصانع عليت الأسعار ولعت معاها.. الموجة الحالية من الزيادة بتتراوح بين 3 لـ 5%، ولسه كمان الموضوع مش ثابت.

رئيس شعبة الأجهزة الكهربائية، أشرف هلال، خرج وقال إن المصانع مش هتعرف تثبت الأسعار طول ما تكلفة الخامات بتعلى، وإن الفترة الجاية كلها معلقة على أسعار الحديد نفسها.. يعني ممكن نزود تاني، وممكن تستقر بس محدش يقدر يقول لأكيد.

يعني اللي حصل ده مش مجرد تحريك أسعار، ده نتيجة مباشرة لزيادة تكلفة المواد اللي الأجهزة بتتصنع منها من الأساس.. والسوق لسه بيعدل نفسه ولسه في مفاجآت جاية!