هبوط قياسي لأسعار الدواجن.. بنك كبير يوقف خدماته مؤقتا.. وقفزة هائلة في الدهب
رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، هبوط قياسي لأسعار الدواجن، وبنك كبير يوقف خدماته مؤقتا، وقفزة هائلة في الدهب.
والبداية بخبر يهم كل المصريين.. لأن أسعار الدواجن ومنتجاتها في مصر نزلت آخر نوفمبر 2025 لأقل مستوى ليها من حوالي 3 سنين، وده بسبب زيادة كبيرة في المعروض.
أسعار الدواجن من أرض المزرعة وصلت لأدنى مستوى في 33 شهر، من أول مارس 2023، وبقت بتتراوح ما بين 52 و59 جنيه للكيلو على حسب الوزن، وده يعني إنها نازلة أكتر من 43 في المية مقارنة بأعلى سعر سجلته في بداية السنة اللي كان 97 جنيه للكيلو.
أما البيض.. فده كمان نزل لأقل مستوى ليه من أكتر من سنتين ونص، وسعر الطبق من أرض المزرعة دلوقتي ما بين 105 و110 جنيه، وده أقل بحوالي 33 في المية عن أعلى سعر سجّله اللي كان فوق 160 جنيه في أول السنة.
وطبعًا المعروف إن أسعار الدواجن بتزيد من 10 لـ15 جنيه للكيلو عن سعر أرض المزرعة في المحلات ومنافذ البيع، ونفس الزيادة دي بتظهر برضه في سعر طبق البيض.
ومصر بتنتج حوالي مليار ونص طائر تسمين في السنة، وكمان أكتر من 15 مليار بيضة مائدة، وده حسب بيانات اتحاد منتجي الدواجن.
ونروح على بنك مصر اللي أعلن إن في عطل تقني شغال حاليًا مؤثر على تقديم بعض الخدمات المصرفية، وقدم اعتذار رسمي عن العطل المؤقت.
بنك مصر قال في بيان النهارده إنهم شغالين على حل المشكلة بأسرع ما يمكن علشان الخدمة ترجع بشكل كامل لكل العملاء، ومأكدين إن فرق العمل بتبذل أقصى جهد علشان ترجع الأمور لطبيعتها
والجدير بالذكر إن صافي أرباح بنك مصر، تاني أكبر بنك حكومي في البلد، زادت بنسبة حوالي 54 في المية خلال 2024، ووصلت لـ81.3 مليار جنيه مقارنة بـ52.8 مليار في 2023
كمان المؤشرات المالية وضحت إن المركز المالي للبنك زاد بنسبة 41 في المية السنة اللي فاتت، ليوصل لـ3.6 تريليون جنيه في نهاية ديسمبر 2024 بدل 2.5 تريليون في 2023، وتخطّى حاجز 4 تريليون جنيه في أغسطس 2025
ونروح لإيهاب واصف، رئيس شعبة الذهب والمعادن الثمينة باتحاد الصناعات، اللي قال إن سوق الذهب في مصر شهد الأسبوع اللي فات موجة صعود واضحة، وده انعكس على سعر عيار 21 اللي طلع بنسبة 3.31 في المية، ووصل لـ5625 جنيه للجرام بدل 5445 جنيه في بداية الأسبوع، ومسجل أعلى مستوى في أسبوعين عند 5630 جنيه
واصف وضّح إن الأداء الإيجابي ده كان مدعوم بارتفاع أسعار الذهب عالميًا اللي رجعت تقترب من أعلى مستوياتها في أسبوعين، وكمان مع التحرك التدريجي في سعر الدولار قدام الجنيه، وده إدّى دفعة للتسعير المحلي.
وأضاف إن الذهب المحلي حقق في شهر نوفمبر مكاسب 270 جنيه للجرام بنسبة زيادة 5.2 في المية، وده بشكل أساسي بسبب صعود الأونصة عالميًا، خصوصًا إن سعر الصرف كان مستقر معظم الشهر، وده خلّى السوق المحلي حساس أكتر لتحركات البورصة الدولية.
وننهي مع سوق الصرف.. سعر الدولار مستقر النهارده قدام الجنيه حسب آخر تحديث من البنك المركزي المصري، وسجل 47.85 جنيه للشراء و47.70 جنيه للبيع
وده أسعار الدولار في أكبر البنوك النهارده:
في البنك الأهلي المصري
47.55 للشراء
47.65 للبيع
وفي بنك مصر
47.60 للشراء
47.70 للبيع
وفي بنك القاهرة
47.55 للشراء
47.65 للبيع
وفي بنك الإسكندرية
47.50 للشراء
47.60 للبيع
وفي البنك التجاري الدولي CIB
47.55 للشراء
47.65 للبيع
وفي البنك العربي الأفريقي الدولي
47.55 للشراء
47.65 للبيع
وفي بنك أبوظبي الإسلامي
47.67 للشراء
47.77 للبيع
وفي بنك التعمير والإسكان
47.53 للشراء
47.63 للبيع
