هبوط تاريخي لأسعار الدواجن والبيض في مصر.. إيه اللي بيحصل؟

فيه حاجة غريبة بتحصل في سوق الدواجن والبيض.. الأسعار نزلت لأقل مستوى من 3 سنين تقريبًا!

الفراخ من المزرعة بقت بين 52 و59 جنيه للكيلو

رقم مكناش بنشوفه من مارس 2023!
والبيض خلال شهر نوفمبر الطبق وصل لــ 105 جنيه.. بعد ما كان فوق 160 أول السنة!

طب ليه الأسعار نازلة بالشكل ده؟
الخبراء بيقولوا إن السبب هو زيادة ضخمة في المعروض.

مزارع كتير صغيرة وكبيرة زودت الإنتاج، وكمان في دواجن أوزانها كبيرة اتباعت كلها مرة واحدة فالسوق بقى فيه زيادة
الموضوع مكانش في الفراخ بس.. المعادلة بدأت من الكتاكيت!
سعر الكتكوت نزل من 55 جنيه لـ 15 بس.

وده خلى جزء كبير من بيض التفريخ يتوجه للاستهلاك الغذائي فالبيض زاد والسعر وقع.

لكن المشكلة إن الأسعار دلوقتي أقل من تكلفة الإنتاج.. والمنتجين بيقولوا إن تكلفة طبق البيض الحقيقية 142 جنيه.. وتكلفة كيلو الفراخ 65 جنيه من غير تكاليف التدفئة في الشتاء.

وده معناه إن الصناعة بتخسر، وممكن ناس كتير تطلع من السوق قبل رمضان.

والحل اللي اقترحوه.. إن الحكومة تكون مخزون من الدواجن المجمدة والمبردة.. وتشتري من المنتجين المحليين بدل المستورد.. وفعلًا في مفاوضات دلوقتي مع وزارة التموين وجهاز مستقبل مصر عشان ياخدوا كميات كبيرة.

الواضح إننا قدام موسم أسعار منخفضة
بس السؤال: هل ده في مصلحة المستهلك ولا هيرجع يرفع الأسعار تاني؟