إزاي ترجع الكهرباء لو العداد فصل شحن.. السر في بطاقة الرقم القومي
لو في يوم الكهربا قطعت عندك عشان عداد الشحن فصل ومش لاقي الكارت
متقلقش.. في حل سهل جدًا ناس كتير متعرفهوش!
جهاز تنظيم مرفق الكهرباء أعلن إنه تقدر ترجع التيار فورًا باستخدام بطاقة الرقم القومي أو فيزا البنك!
أيوه زي ما سمعت كده، أي بطاقة ممغنطة تقدر تدخلها في العداد لحد ما تجيب الكارت وتشحنه.
وبرضه ناخد بالنا من شوية نصايح مهمة:
متلعبش أبدًا في غطا العداد.. لأن ده بيعمل محضر تلاعب فورًا.. أول ما الرصيد يوصل 10 جنيه، لمبة الرصيد بتنور أحمر ودي علامة إنك لازم تشحن.
لو الكهربا قطعت ورصيدك قليل، دخل الكارت بس من غير شحن، هيرجع التيار مؤقتًا لحد ما تشحن.
يفضل الشحن في أول أسبوع من الشهر، عشان تكون على الشريحة الأولى.
ولو الكارت ضاع متقلقش، كل الشحنات بتفضل محفوظة في ذاكرة العداد.
وعموما أي مشكلة في الكارت أو لو فصل العداد 3 مرات بسبب الأحمال لازم ترجع لشركة الكهرباء. فافتكر دايمًا ان البطاقة القومية ممكن تنقذ يومك!
