من غير ما تروح شركة الكهرباء.. اعرف إزاي تستعلم عن فاتورة نوفمبر وتسددها أونلاين

فاتورة كهرباء شهر نوفمبر 2026.. تقدر تعرف قيمتها وتدفعها من البيت، من غير ما تضطر تروح شركة الكهرباء.

مع بداية شهر نوفمبر، ناس كتير بتدور على طريقة الاستعلام عن فاتورة الكهرباء، ووزارة الكهرباء والطاقة المتجددة بتوفر خدمة إلكترونية تقدر من خلالها تعرف قيمة الفاتورة باستخدام بياناتك ورقم العداد.

كل اللي عليك تدخل على الموقع الرسمي لوزارة الكهرباء، وتختار قسم الخدمات، وبعدها خدمة الاستعلام عن الفواتير المباشرة.

هتسجل عنوانك بالتفصيل والمحافظة، والرقم القومي المكون من 14 رقم، وكمان رقم العداد المكون من 10 أرقام، وبعدها تضغط على الاستعلام علشان تظهرلك قيمة الفاتورة المستحقة.

أما الدفع، فمتاح من خلال الموقع الإلكتروني، والمنصة الموحدة لخدمات الكهرباء، ومنافذ فوري والبريد، والمحافظ البنكية والإلكترونية، وماكينات الصراف الآلي.

يعني تقدر تستعلم وتسدد فاتورتك من الموبايل أو أقرب منفذ دفع، وتوفر وقت ومجهود، من غير زيارة مقر شركة الكهرباء.