تيسيرات للمصانع المتعثرة.. تراجع واضح للدهب.. وكشف بترولي جديد
رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، تيسيرت للمصانع المتعثرة، وتراجع واضح للدهب، وكشف بترولي جديد.
نبدأ من وزارة الصناعة اللي أعلنت مؤخرًا عن حزمة جديدة من المهل والتيسيرات للمشروعات الصناعية المتعثرة اللي عدت المدد الزمنية المحددة ليها، وده حرصًا من الوزارة على الحفاظ على مصالح المصنعين ومساعدة المصانع الجادة اللي عايزة ترجع عجلة الإنتاج تدور.
المهل والتيسيرات دي اللي هتنفذها الهيئة العامة للتنمية الصناعية سارية لحد 30 أبريل 2026، وتشمل الآتي:
مهلة 6 شهور للمشروعات اللي خلصت أكتر من 50 في المية من الإنشاءات علشان تكمل المشروع.
مهلة 12 شهر للمشروعات اللي ما عملتش أي نسبة بنائية أو لسه ما وصلتوش لنسبة 50 في المية من الإنشاءات.
مهلة 18 شهر للمشروعات اللي ما استخرجتش رخصة بناء ولسه ما بدأتش أي أعمال إنشائية، علشان يقدروا يطلعوا رخصة البناء والتشغيل والسجل الصناعي.
ونروح لسوق الصاغة. أسعار الذهب نزلت النهارده في السوق المحلي. وعيار 21 اللي هو الأكثر انتشارًا بين المصريين سواء للادخار أو للزواج سجل النهارده حوالي 5455 جنيه للجرام.
عيار 24 سجل حوالي 6228.5 جنيه للجرام، وده أعلى عيار من حيث نقاء الذهب، وكان الأسبوع اللي فات معدي 6600 جنيه.
العيار ده بيكون اختيار مفضل للمستثمرين اللي بيدوروا على الذهب الخام، لكن الإقبال عليه بيكون أقل شوية بسبب سعره العالي.
عيار 21 سجل حوالي 5455 جنيه للجرام، وده الأكثر شعبية عشان مرتبط بالزواج والادخار، وكمان هو المؤشر الأساسي لحركة السوق.
عيار 18 سجل حوالي 4671.5 جنيه للجرام، وده اللي الشباب بيحبوه بسبب سعره المناسب وتصميماته اللي متنوعة وشكله العصري.
عيار 14 وصل 3633.25 جنيه للجرام، وده اختيار اقتصادي للي عايز يشتري دهب بسعر أقل.
الجنيه الذهب سجل حوالي 43600 جنيه، ووزنه 8 جرام من عيار 21.
ونروح لوزارة البترول والثروة المعدنية اللي أعلنت عن كشف بترولي جديد في خليج السويس حققته شركة جابكو، وهي شركة عمليات مشتركة بين الهيئة العامة للبترول وشركة دراجون أويل الإماراتية.
الوزارة قالت في بيان النهارده إن الكشف حصل بعد نجاح حفر البئر الاستكشافية كريستال شمال شرق رمضان، واللي المفروض تدخل الإنتاج خلال أيام بمعدل حوالي تلاتة آلاف برميل يوميًا من الزيت الخام.
الكشف ده بييجي ضمن سلسلة من أعمال الاستكشاف اللي حصلت مؤخرًا، واللي اتعملت باستخدام تقنية المسح السيزمي القاعي OBN اللي ساعدت في تحديد تراكيب جيولوجية جديدة تحت قاع البحر ما كانش ممكن الوصول ليها قبل كده.
ونختم بخبر لطيف. تعاملات الإنتربنك الدولاري في مصر ارتفعت لمتوسط 880 مليون دولار يوميًا خلال الأسبوع اللي بدأ من يوم الأربعاء اللي فات ولحد امبارح، وده حسب مصادر مصرفية.
والمصادر وضحت إن الزيادة بسبب ارتفاع معدلات البيع والشراء، خاصة إن التداول الطبيعي بيكون ما بين 150 و250 مليون دولار يوميا.
الجنيه المصري شهد تقلبات خلال الأسبوع. بعد ما وصل لأعلى مستوى في 18 شهر ونزل الدولار تحت 47 جنيه لأول مرة من مايو 2024، رجع الجنيه يتراجع في اليومين اللي فاتوا وخسر حوالي 33 قرش.
وده حصل رغم دخول صافي مليار دولار من الأموال الساخنة عبر السوق الثانوية للدين الحكومي من بداية تعاملات يوم الأحد، وكان أكبر تدفق يوم الأربعاء بحوالي 845 مليون دولار.
