365 ألف جنيه زيادة فوق السعر الرسمي.. إيه اللي بيحصل في سوق شيفروليه الدبابة والجامبو؟

تخيل تروح تشتري عربية نقل، وتتفاجئ أن السعر اللي الشركة معلناه مش هو السعر اللي التاجر طالب يبيعلك بيه.

دي الأزمة اللي رجعت تاني لسوق سيارات شيفروليه في مصر، وبالتحديد موديلات الدبابة والجامبو، بعد ما شركة المنصور، الوكيل المحلي للعلامة، أعلنت زيادات جديدة على الأسعار الرسمية.

لكن المفاجأة أن الزيادة الرسمية مش آخر الحكاية! عدد من التجار والموزعين رجعوا يفرضوا مبالغ إضافية تحت مسمى «الأوفر برايس»، والزيادة في بعض الفئات وصلت لحوالي 365 ألف جنيه!

يعني المشتري بيدفع الزيادة اللي أقرتها الشركة، وفوقها ممكن يلاقي نفسه مطالب بمئات الآلاف علشان يستلم العربية.

والأزمة هنا مش بس في الأسعار، لكن كمان في تأثيرها على أصحاب الأنشطة التجارية والنقل، اللي العربيات دي بتعتبر مصدر رزق أساسي ليهم.

والسؤال: هل الأوفر برايس هيفضل مستمر؟ ولا الرقابة هتتحرك علشان توقف الزيادات الإضافية دي؟