في الصدارة اقتصاديا.. مصر تتربع على عرش أقوى الدول الإفريقية في احتياطيات النقد الأجنبي لعام 2025
في عالم مليان أزمات مالية وتقلبات في الأسواق، قليل جدًا الدول اللي بتقدر تحافظ على قوة احتياطياتها من النقد الأجنبي، ومصر في 2025 مش بس حافظت دي طلعت لقدام واحتلت مكانة بين أقوى 10 دول إفريقية في الاحتياطيات، بعد ما وصلت لأكتر من 50 مليار دولار لأول مرة من فترة طويلة، والخطوة دي بتقول إن فيه تغيير حقيقي بيحصل في الاقتصاد، وإن فيه مصادر دخل بتزيد واحتياطيات بتتعزز بشكل واضح.
لما نيجي نبص على وضع مصر الاقتصادي في 2025، هنلاقي إن أهم نقطة بتحكي القصة هى احتياطيات النقد الأجنبي، الرقم اللي وصل لـ 50.071 مليار دولار في أكتوبر 2025 مش مجرد رقم محسوب على الورق.. ده مؤشر على قوة مالية بترجع تدريجيًا، وعلى قدرة البلد إنها تواجه أي صدمة في العملة أو في الأسواق العالمية.
من بداية السنة، احتياطي مصر زاد حوالي 3 مليار دولار، وده في وقت دول كتير في إفريقيا كانت بتعاني من تراجع بسبب تقلبات أسعار السلع الأساسية وتراجع الاستثمارات، ورغم كده، مصر قدرت تزود احتياطياتها وتثبت مكانها على خريطة القوى الاقتصادية في القارة.
وبصراحة قوة الاحتياطي مجرد خطوة في منظومة أكبر بتتغير، مصر بقالها فترة ماشية في طريق إصلاح اقتصادي تقيل، وبتعيد ترتيب أولوياتها مع مؤسسات دولية ومع شراكات مالية جديدة بتفتح أبواب استثمار كانت مقفولة قبل كده، والنتيجة؟ ثقة بتزيد واحتياطي بيرتفع وجنيه بيبقى محمي نسبيًا قدام تغيرات السوق,
واحدة من أهم القوى الداعمة للاحتياطي كانت زيادة مصادر العملة الصعبة، الصادرات المصرية ارتفعت، والإيرادات السياحية رجعت تتنفس تاني، لكن المفاجأة الأكبر كانت تحويلات المصريين في الخارج اللي كسرت كل الأرقام، وصلت خلال أول 9 شهور من 2025 لـ 30.2 مليار دولار يعني زيادة 45% كاملة عن السنة اللي فاتت.
والرقم ده لوحده كفيل إنه يغير شكل الاحتياطي، لأنه مصدر ثابت ومستمر، وبيعكس إن المصريين بره رافعين اقتصاد بلدهم بشكل ضخم، وفي سبتمبر بس، التحويلات وصلت لـ 3.6 مليار دولار، شهر واحد! وده بيأكد إن المنحنى مش طالع بس لا، ده بيجري لفوق.
على الجانب التاني، قيمة أرصدة الذهب داخل احتياطي مصر ارتفعت هي كمان، وزادت بـ 702 مليون دولار في شهر واحد بس لحد ما وصلت لـ 16.5 مليار دولار، وده بيدي الاحتياطي ثقل أكبر، لأن الذهب جزء مهم من أي قوة مالية لأي دولة.
ولو هنقارن مصر بباقي دول إفريقيا، هنلاقي إن قائمة الأقوى ماليًا ضمت ليبيا، الجزائر، جنوب إفريقيا، المغرب، وتونس وكلهم دول عندها احتياطيات ضخمة، لكن وجود مصر في القائمة دي بيقول إن البلد بقت لاعب رئيسي مش بس عربي لكن إفريقي كمان.
واقتصادات تانية زي نيجيريا وكوت ديفوار وأنجولا ماشية في طريقها للتعافي، لكن لسه بعيدة عن الاستقرار اللي مصر بتحققه حاليًا، يعني السوق الإفريقي كله بيتغير، ومصر واحدة من الدول اللي بتسحب الكرسي وتقعد قدّام وتحط رجل على رجل كمان.
يعني اللي بيحصل في الاحتياطي مش مجرد أرقام شهرية بتطلع وتنزل، ده تحول اقتصادي، ودايمًا التحولات الكبيرة بتبدأ برقم والرقم دلوقتي هو: 50 مليار دولار، واللي جاي باين إنه أكبر.
