هبوط الدولار.. قفزة تاريخية في احتياطي النقد الأجنبي.. وانخفاض أسعار الذهب
رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، هبوط كبير في سعر الدولار، وقفزة تاريخية في احتياطي النقد الأجنبي، وانخفاض اسعار الدهب.
والبداية من سوق الصرف...
النهارده، شهد سعر الدولار الأمريكي قدّام الجنيه المصري تراجع واضح بحوالي 6 قروش في ختام التعاملات، وده بالتزامن مع إعلان البنك المركزي إن احتياطي النقد الأجنبي ارتفع ووصل لـ 50.07 مليار دولار في أكتوبر، مقارنة بـ 49.53 مليار دولار في سبتمبر اللي فات.
وسجّل متوسط سعر الدولار في البنك المركزي حوالي 47.28 جنيه للشراء و47.41 جنيه للبيع.
أما في البنوك الحكومية الكبيرة زي بنك مصر والبنك الأهلي، فالسعر كان عند 47.30 جنيه للشراء و47.40 جنيه للبيع.
وفي باقي البنوك:
بنك القاهرة: 47.30 للشراء و47.40 للبيع.
البنك التجاري الدولي (CIB): 47.28 للشراء و47.38 للبيع.
بنك الإسكندرية: 47.28 للشراء و47.38 للبيع.
كريدي أجريكول: 47.25 للشراء و47.35 للبيع.
أما في شركات الصرافة، الأسعار فضلت شبه مستقرة عند 47.34 للشراء و47.44 للبيع.
ومن سوق الصرف نروح للبنك المركزي...
اللي أعلن إن صافي الاحتياطي النقدي ارتفع في أكتوبر لـ 50.07 مليار دولار بدل 49.53 مليار في سبتمبر، وده رقم تاريخي بيدل إن الاحتياطي في نمو مطّرد بفضل تحسن مصادر العملة الأجنبية.
التحسن ده جاي من أكتر من اتجاه:
الصادرات بترتفع بشكل مستمر من بداية السنة، وكمان دخل السياحة وتحويلات المصريين في الخارج زاد بشكل ملحوظ.
وبحسب بيانات البنك المركزي، تحويلات المصريين في الخارج زادت بنسبة 47.2% خلال أول 8 شهور من السنة، ووصلت لحوالي 26.6 مليار دولار، مقارنة بـ 18.1 مليار السنة اللي فاتت.
ونروح بعد كده لسوق الذهب...
اللي شهد النهارده، في تعاملات اليوم، انخفاض بحوالي 5 جنيهات في أسعار المعدن النفيس، حسب تصريحات نادي نجيب، سكرتير عام شعبة الذهب السابق.
تفاصيل الأسعار كانت كالتالي:
عيار 14 سجل حوالي 3560 جنيه للجرام.
عيار 18 نزل لـ 4577 جنيه للجرام.
عيار 21 وصل لـ 5340 جنيه للجرام.
عيار 24 بـ 6102 جنيه للجرام.
أما الجنيه الذهب فسجّل 42720 جنيه، مع اختلاف بسيط من تاجر للتاني.
وسبيكة الذهب 10 جرام وصل سعرها لـ 61020 جنيه، أما الأونصة اللي بتزن 31.1 جرام فسجّلت حوالي 189772 جنيه، وسبيكة الـ50 جرام بـ 305100 جنيه تقريبًا.
وفي الختام نروح لخبر مهم جدًا...
الجهاز المركزي للتعبئة العامة والإحصاء أعلن إن العجز في الميزان التجاري انخفض لـ 4.73 مليار دولار في أغسطس 2025، مقارنة بـ 4.96 مليار دولار في نفس الشهر السنة اللي فاتت، يعني بنسبة انخفاض حوالي 4.6%.
وفي المقابل، الصادرات المصرية زادت بنسبة 6.7%، ووصلت لـ 3.96 مليار دولار في أغسطس، بدل 3.71 مليار السنة اللي فاتت.
وده بسبب ارتفاع صادرات بعض السلع المهمة، زي الملابس الجاهزة اللي زادت 20.6%، والعجائن والمحضرات الغذائية 29.1%، والبترول الخام 7.6%، والصابون ومحضرات التنظيف 29.4%.
لكن في نفس الوقت، انخفضت صادرات منتجات تانية زي منتجات البترول بنسبة 21.6%، واللدائن (البلاستيك الخام) بنسبة 30.3%، والأسمدة 29.9%، والفواكه الطازجة 15.2%.
