3 مليارات دولار تنعش خزينة الاقتصاد المصري.. مصر تفاجئ السوق بقرار وقف دعم الغاز للمصانع الجديدة
منصات بانكير قدمت النهاردة عدد من التقارير والتحليلات الخاصة في الشأن الاقتصادي والمالي المصري، البداية بتقرير عن 3 مليارات دولار تنعش خزينة الاقتصاد المصري.
العلاقات الاقتصادية بين مصر وألمانيا ماشية بخطوات سريعة جدًا، خصوصًا بعد ما زادت الاستثمارات الألمانية في السوق المصري وعدّت 3 مليارات دولار، وده دليل واضح على الثقة اللي الشركات الألمانية بقت حاساها في الاقتصاد المصري بعد الإصلاحات الكبيرة اللي حصلت في السنين الأخيرة.. من أبرز الأمثلة شركة بوش الألمانية، اللي افتتحت مصنع جديد في العاشر من رمضان باستثمارات حوالي 64 مليون دولار لتصنيع أجهزة الغاز المنزلية، ونص الإنتاج هيتم تصديره لإفريقيا والشرق الأوسط، وده معناه إن مصر بقت مش بس مركز إنتاج، لكن كمان بوابة تصدير إقليمية.
التقرير كشف أن في شركات ألمانية تانية شغالة في مجالات متنوعة، زي سيمنس للطاقة اللي ليها دور كبير في مشروعات الكهرباء والطاقة المتجددة، وفولكس فاجن في السيارات، وBASF في الكيماويات، وميرك في الأدوية والتقنيات الحيوية ودويتشه بان اللي بتتعاون مع وزارة النقل لتطوير السكك الحديدية.
النهارده مصر بقت واحدة من أكتر الدول الجاذبة للاستثمار في الشرق الأوسط وإفريقيا، بفضل التشريعات الاقتصادية الجديدة، والاستقرار المالي، والبنية التحتية القوية، بجانب المميزات التنافسية زي العمالة المؤهلة وتكاليف الإنتاج المنخفضة.. كمان الحكومة بتقدم حوافز وضمانات قوية للمستثمرين، زي الإعفاءات الضريبية وتسهيل تخصيص الأراضي الصناعية، وده شجع أكتر من ألف شركة ألمانية تشتغل في مجالات متنوعة داخل مصر.
منصات بانكير قدمت تقرير مختلف النهاردة عن مصر تفاجئ السوق بقرار وقف دعم الغاز للمصانع الجديدة..
كشف التقرير، أن الحكومة عملت قرار مفاجئ قلب موازين السوق الصناعي، بعد ما أعلنت أنها هتوقف دعم الغاز للمصانع الجديدة وتبدأ تبيع الغاز بسعر غير مدعوم بيتحسب حسب تكلفة الإنتاج والاستيراد، ومعاه زيادة دولار واحد لكل مليون وحدة حرارية... القرار ده بدأ تطبيقه فعليًا من 16 سبتمبر، وبيتم مراجعته كل 3 شهور حسب تغيرات السوق العالمية.
وأكد التقرير، أن الحكومة حددت أسعار الغاز الجديد، وهي مصانع الأسمدة الأزوتية: 4.5 دولار، ومصانع الحديد والصلب والأسمدة غير الأزوتية: 5.75 دولار ومصانع الأسمنت: 12 دولار والأنشطة الصناعية الأخرى: 4.75 دولار ومحطات الكهرباء: 4 دولار ومعامل الطوب: 210 جنيه لكل ألف وحدة حرارية.. لكن الحكومة استثنت 4 مصانع وهي "المصرية للأسمدة"، "موبكو"، "إيبك"، و"ميثانكس" لأن عندهم عقود قديمة مع إيجاس بتربط السعر بالمواد العالمية زي اليوريا والميثانول.
القرار جه في وقت بتواجه فيه مصر تراجع في إنتاج الغاز وزيادة في الفجوة بين العرض والطلب، وده خلّى الحكومة تسرّع عمليات الاستكشاف خصوصًا في البحر المتوسط بالتعاون مع شركات زي شيفرون.. في المقابل، الحكومة بتحاول تحفّز الشركات الأجنبية، فسمحت لهم يصدروا جزء من إنتاجهم لتسديد المستحقات، ورفعت سعر شراء حصة الشركاء الأجانب من الغاز.. ودعم الغاز الصناعي كان بيكلف الدولة حوالي 165 مليون دولار شهريًا، وده رقم ضخم، علشان كده الحكومة بتخطط تلغي الدعم بالكامل خلال 3 سنين بشكل تدريجي.. واللي خلى الدولة تاخد قرار زي ده، أنها بتحاول توازن بين تشجيع الصناعة وتقليل عبء الدعم.
وحدة أبحاث بانكير قدمت تقرير خاص النهاردة عن بناء محطة عملاقة لتحويل 2000 طن مخلفات لطاقة نظيفة.
التقرير كشف أن المخلفات الموجودة في الشوارع هتتحول إلى كهربا وتنور المصانع والبيوت.. وده اللي بيحصل فعلًا في محافظة القليوبية، اللي بدأت تنفيذ أكبر محطة في مصر لتوليد الكهرباء من المخلفات، وده مشروع هيغير شكل المحافظة ويفتح باب جديد للطاقة النظيفة.
الموضوع بدأ لما المهندس أيمن عطية، محافظ القليوبية، أعلن إنهم هيحولوا أكتر من 2000 طن قمامة يوميًا لـ62 ميجاوات كهربا في الساعة، يعني المخلفات اللي كانت بتسبب مشاكل هتبقى سبب في النور والطاقة.. واللي أكد كمان أن ملف النظافة على رأس أولوياته، لكن المرة دي التفكير مختلف، مش مجرد جمع قمامة وخلاص، لكن تحويلها لطاقة مفيدة تخدم الاقتصاد والمجتمع.
المشروع هيربط 54 ميجاوات بالشبكة القومية للكهربا، وده معناه دعم ضخم للمصانع خصوصًا اللي بتستهلك كهربا كتير زي المسابك، وكمان هيخلق فرص شغل جديدة للشباب وهيخلي شكل القليوبية أحسن بكتير.
التقرير أكد كمان أن المحافظة اتعاونت مع شركة عالمية متخصصة في تدوير المخلفات، وهي اللي هتنفذ المشروع خلال حوالي 3 سنين، لكن تأثيره هيستمر لعقود طويلة، لأنه جزء من رؤية مصر 2030 اللي بتركز على التنمية المستدامة والطاقة النظيفة.. غير كده، المشروع هيساعد في تقليل التلوث والروائح، وكمان هيقلل الاعتماد على المدافن الصحية اللي كانت بتستهلك مساحات كبيرة من الأراضي.. والمحافظ أكد أن المحافظة جاهزة تدعم أي مستثمر يدخل في المجال ده، لأن تحويل المخلفات لقيمة اقتصادية مش مجرد مشروع بيئي، ده خطة لتطوير المحافظات كلها.
