سر الملك الذهبي في المتحف المصري الكبير.. حكاية قناع وتابوت توت عنخ آمون
في لحظة العالم كله مستنيها.. المتحف المصري الكبير بيفتح أبوابه، والعالم كله عينه على قاعة واحدة.. القاعة اللي جوّاها سر أعظم ملوك التاريخ.. الملك الذهبي توت عنخ آمون.
قاعة متفردة فيها أكتر من ٥ آلاف قطعة ذهبية.. كل قطعة منهم معمولة بإيدين الفراعنة من آلاف السنين ولسه لحد النهارده محتفظة ببريقها كأنها خارجة من الورشة امبارح.
لكن وسط كل الكنوز دي، في تحفة واحدة الدنيا كلها بتدور حواليها، قناع توت عنخ آمون الذهبي.. القطعة الأثرية الأغلى في تاريخ البشرية، واللي العلماء بيقولوا عنها "مالهاش تمن".
كفاية إن وزنه أكتر من ١٠ كيلو دهب خالص، عشان كده المتحف خصصلُه جناح ملكي يليق بملك مش عادي، ملك هزّ الدنيا رغم إنه عاش ومات صغير.
ولسه المفاجأة مش هنا.. التابوت الذهبي نفسه!
وزنه أكتر من ١١٠ كيلو دهب مرصّع بالأحجار الكريمة، وكان هو اللي شايل مومياء الملك، ملفوفة بالكتان إلا وشه اللي عليه القناع الأسطوري.
تحفة مش بس غالية.. تحفة بتحكي عبقرية الفراعنة، وبتثبت إن الحضارة دي مش مجرد تاريخ، دي معجزة صنعها المصريين من آلاف السنين ولسه مبهرة العالم لحد النهارده.
