العد التنازلي بدأ.. وداعا للإيجار القديم وتطبيق القانون 164.. تعرف على قيمتك الإيجارية الجديدة
خلاص يا جماعة.. اللعبة اتغيرت
الإيجار اللي كنا بنسمع عنه من زمان بـ20 و50 جنيه انتهى رسميًا
بعد 70 سنة من الجدل بين الملاك والمستأجرين، الدولة قررت تحسمها وتبدأ صفحة جديدة بقانون جديد تمامًا اسمه القانون 164 لسنة 2025
ودلوقتي العد التنازلي بدأ.. وديسمبر الجاي هو أول شهر في عهد الإيجار الجديد.
القصة بدأت بعد سنين طويلة من الشد والجذب بين الملاك والمستأجرين، وكل طرف شايف نفسه مظلوم
الملاك بيقولوا إنهم بقوا بياخدوا إيجارات قليلة جدا متجبش تمن علبة سجاير، والمستأجرين شايفين إنهم بنوا حياتهم حوالين بيوت مأجورة من سنين ومش عارفين هيعملوا إيه لو الأسعار زادت فجأة.
لكن الدولة المرة دي قررت تحسمها بشكل رسمي.. القانون الجديد دخل حيز التنفيذ، ومعاه كل حاجة اتغيرت.
ابتداءً من أول ديسمبر 2025، الإيجارات القديمة هتتراجع تاريخيًا، وهيبدأ تطبيق القيم الجديدة على حسب المنطقة اللي فيها الوحدة.
في المناطق الراقية
الإيجار هيبقى 20 ضعف الإيجار القديم، وبحد أدنى 1000 جنيه في الشهر.
اما في المناطق المتوسطة
هيكون 10 أضعاف، يعني أقل حاجة حوالي 400 جنيه.
وفي المناطق الشعبية:
الحد الأدنى 250 جنيه شهريًا.
يعني مثلًا لو كنت بتدفع 250 جنيه إيجار شقتك، من ديسمبر ممكن تدفع 1000 أو أكتر على حسب موقعها.
بس الموضوع مش زيادة وخلاص
القانون الجديد كمان هيحرر العلاقة بين المالك والمستأجر بالكامل بعد 7 سنين للوحدات السكنية، وبعد 5 سنين للوحدات التجارية زي المحلات والمكاتب.
يعني بعد السنين دي، العقد هيتجدد بالاتفاق بين الطرفين أو ينتهي نهائيًا، وده لأول مرة يحصل من 70 سنة.
مصطفى عبد الرحمن، رئيس اتحاد ملاك العقارات القديمة، قال إن أغسطس 2025 هيبقى يوم تاريخي، لأن الرئيس صدق على القانون اللي أنهى عقود من الجمود، وإن بداية التطبيق الرسمي للإيجارات الجديدة هتبدأ أول ديسمبر الجاي.
والقانون ما نسيش المستأجرين، بالعكس
مديهم مهلة انتقالية 7 سنين للسكن و5 سنين لغير السكن، عشان الناس تلحق تظبط أوضاعها وتدور على حلول مناسبة.
وخلال المدة دي، المستأجر هيفضل يدفع 250 جنيه مؤقتا لحد ما لجان الحصر والتقييم تحدد القيمة النهائية.
لكن خد بالك، القانون كمان حط حالات ممكن يحصل فيها إخلاء فوري، زي لو الشقة مقفولة أكتر من سنة من غير سبب، أو لو المستأجر أو حد من أسرته عنده شقة تانية مناسبة.
وبرضه وفر بدائل للناس اللي محتاجة فعلاً، زي إن الدولة هتوفر وحدات بديلة بالإيجار أو التمليك لكبار السن ومحدودي الدخل بشرط إنهم يسلموا الشقة القديمة فورًا بعد التخصيص.
يعني باختصار .. بعد سبعين سنة من الجمود، مصر داخلة على عصر جديد في سوق الإيجارات، عصر بيحاول يحقق التوازن بين المالك والمستأجر، ويرجع العدل لسوق العقار اللي كان واقف مكانه من سنين.
فاللي بيدفع 20 جنيه زمان خلاص.. من ديسمبر الجاي، الصفحة دي اتقفلت رسميًا
استعد، سواء كنت مالك أو مستأجر.. لأن ديسمبر مش شهر عادي، ده الشهر اللي بيعلن نهاية عصر وبداية عهد جديد للإيجار في مصر.
