تفاصيل حصر 192 موقعا مطلا على كورنيش النيل بالقاهرة والجيزة وطرحها كفرص استثمارية
في خطوة بتكشف عن توجه الدولة لتعظيم الاستفادة من أصولها الغالية، الحكومة بدأت تتحرك بجدية علشان تستغل الأراضي والمباني المطلة على كورنيش النيل في القاهرة والجيزة، وده عن طريق تحويلها لفرص استثمارية جديدة ممكن تغير شكل الكورنيش وتزود عوائد الدولة بشكل كبير.
كورنيش النيل في القاهرة والجيزة مش مجرد ديكور او نهر بيعدي في نص العاصمة، ده واحد من أغلى وأجمل المواقع في مصر كلها.
لكن الحقيقة إن في مساحات كبيرة جدًا كانت لسنين طويلة مش مستغلة بالشكل الصح، أراضي فاضية، مباني قديمة، أو أماكن مقفولة من غير فايدة، علشان كده، الحكومة بدأت مشروع ضخم لحصر كل الأصول اللي على النيل وتحويلها لفرص استثمارية حقيقية.
بس الفكرة مش بس تجميل المكان، لكن كمان تعظيم الاستفادة من الأراضي دي.. يعني بدل ما تفضل مجرد مشهد حلو، تبقى مصدر دخل وفرص شغل.
والمشاريع اللي ممكن تتعمل هناك مش محدودة: ممكن تبقى مطاعم، كافيهات، ممشى سياحي، فنادق، مولات صغيرة، أو حتى مناطق خضراء ترفيهية، كل ده تحت إطار استثماري يخلي المكان حي أكتر ويفيد الناس والدولة في نفس الوقت.
وبحسب البيانات اللي اتجمعت، تم حصر 192 موقع كاملين على كورنيش النيل ما بين القاهرة والجيزة.
في القاهرة لوحدها فيه 110 مواقع بمساحة حوالي 430 فدان موزعين على مناطق زي روض الفرج، بولاق أبو العلا، مصر القديمة، السيدة زينب، دار السلام، المعادي، وطرة.
وفي الجيزة، 82 موقع بمساحة تقارب 315 فدان في أماكن زي الوراق، إمبابة، العجوزة، والدقي.
الموضوع اتبنى على قاعدة بيانات جديدة بتوضح كل قطعة أرض، مين الجهة اللي تبعها، واستخدامها الحالي إيه، وده معناه إن أي مستثمر هيبقى قدامه كل التفاصيل بوضوح، من أول مساحة الأرض، لحد نوع النشاط اللي ينفع فيها، وسعرها التقديري.
التحرك ده بيمثل نقلة حقيقية في فكر إدارة الأصول، بدل ما الأراضي دي تفضل متقفلة أو غير مستفاد منها، هتتحول لمشروعات حقيقية تفتح بيوت وتخلق حياة على ضفاف النيل.
كمان ده هيساعد في تحسين شكل الكورنيش اللي بقى عليه ضغط كبير السنين اللي فاتت، وهيرجع له رونقه السياحي اللي القاهرة والجيزة كانوا معروفين بيه.
باختصار، الحكومة بتحاول تعيد اكتشاف كورنيش النيل، مش من خلال الكلام أو التطوير التجميلي بس، لكن بخطة استثمارية واضحة، ومع طرح المواقع دي، ممكن نشوف في السنين الجاية كورنيش مختلف تمامًا .. أنظف، أشيك، وفيه حياة وشغل وحركة على طول.
