المصريين ولعوا أكتر من 56 مليار سيجارة في سنة واحدة
الخميس 23/أكتوبر/2025 - 05:14 ص
شركة "إيسترن كومباني" أعلنت إن المصريين دخنوا 56 مليار سيجارة في السنة المالية 2024/2025!. وده رقم ضخم جدًا مقارنة بالسنة اللي قبلها اللي كانت حوالي 44 مليار سيجارة، يعني زيادة وصلت لـ 27%
الزيادة دي حصلت بسبب ارتفاع الطلب في السوق المحلي، وكمان زيادة في الصادرات.. أما على ناحية تانية، مبيعات المعسل المحلي نزلت شوية بسيطة وسجلت حوالي 6 آلاف طن
إجمالي المبيعات كمان قفز لـ أكتر من 105 مليار جنيه بعد ما كان حوالي 63 مليار السنة اللي فاتت! يعني باختصار .. السوق مولع حرفيًا!
إيسترن كومباني عاملة أرقام قياسية، والمصريين واضح إنهم دخنوا السنة دي أكتر من أي وقت قبل كده
