أرقام هامة من المركزي.. تصريحات جريئة لرئيس الحكومة.. وهبوط تاريخي للدهب

رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، أرقام هامة من المركزي، وتصريحات جريئة لرئيس لحكومة، وهبوط تاريخي للدهب.
نبدأ من البنك المركزي المصري.. طارق الخولي نائب المحافظ قال إن حجم الخدمات الرقمية اللي بتتقدم للناس في السوق المصرفي المصري بقى ضخم جدًا.
وبيّن إن صندوق دعم وتطوير القطاع المصرفي شغال على تطوير الخدمات الرقمية وتقوية الأمن السيبراني، وقال نصًا: إحنا شغالين على نظام جديد في البنوك علشان نعمل محاكاة للهجمات السيبرانية وندرب الناس على طرق التصدي لها.
وكشف كمان إن عدد المحافظ الإلكترونية في البنوك وصل لـ 55.8 مليون محفظة، وعدد العملاء اللي ليهم حق فتح حسابات بنكية وصل لـ 53.8 مليون عميل، وقال إن حجم تمويل المشروعات الصغيرة والمتوسطة وصل لحوالي 630 مليار جنيه.
ونروح للدكتور مصطفى مدبولي رئيس الوزراء.. مدبولي قال إن الحكومة أصدرت تعليمات واضحة لكل الجهات إنها تكثّف الرقابة على السوق وتمنع أي رفع أسعار من غير مبرر.
وخلال مؤتمر صحفي بعد اجتماع الحكومة، قال إن الزيادة الأخيرة في أسعار الوقود مش مبرر إن الأسعار الأساسية تعلى، ولا إن حد يستغل المواطن، وأكد إن لازم يبقى فيه استقرار في السوق.

وأشار إن الحكومة بتتابع حركة الأسعار يوميًا بالتنسيق مع الأجهزة الرقابية والوزارات علشان يضمنوا توفر السلع ويمنعوا أي مغالاة أو استغلال.
وكمان امبارح مدبولي عقد اجتماع مع حسن عبد الله محافظ البنك المركزي في العاصمة الإدارية لمتابعة تنسيق السياسة المالية مع السياسة النقدية بين الحكومة والمركزي.
ندخل على سوق الصاغة..
أسواق الذهب والفضة شهدت تصحيح سعري جامد بعد 9 أسابيع من الطلوع المتواصل. الهبوط ده جه بسبب قوة الدولار، وكمان انخفاض الطلب في آسيا بعد موسم ديوالي في الهند، ومع تحسن المزاج في الأسواق العالمية بعد بوادر انفراجة في علاقة أمريكا والصين، فالمستثمرين بدأوا يبيعوا ويجنوا أرباح.
سعيد إمبابي المدير التنفيذي لمنصة آي صاغة قال إن الذهب نزل حوالي 120 جنيه النهارده، وبقى عيار 21 = 5470 جنيه.
والأوقية نزلت 92 دولار وبقت 4018 دولار.
عيار 24 سجل 6251 جنيه،
عيار 18 حوالي 4689 جنيه،
عيار 14 حوالي 3647 جنيه،
والجنيه الذهب استقر عند 43760 جنيه.
ونختم بخبر مهم..
مجلس الوزراء وافق على توقيع اتفاقيتين لشراء الطاقة بين الشركة المصرية لنقل الكهرباء وتحالف مصدر – إنفينيتي باور – حسن علام علشان ينفذوا مشروعين للطاقة الشمسية بقدرة 1200 ميجاوات.
المشروعات هتتقام في بنبان بأسوان والواحات، ومعاها أنظمة تخزين بطاريات بقدرة 720 ميجاوات/ساعة علشان استقرار الشبكة القومية.
الخطوة دي ضمن خطة الدولة للتوسع في الطاقة المتجددة، وجذب استثمارات عالمية في قطاع الكهرباء، كجزء من استراتيجية مصر علشان توصل لـ 42% طاقة متجددة بحلول 2035 وتثبت نفسها كمركز إقليمي للطاقة.