قانون الإيجار القديم بيتغير رسميا.. زيادة 20 ضعف.. وشرط واحد يمنعك من الشقة البديلة!
القانون اللي ناس كتير كانت مستنياه.. وأكتر ناس تانية كانت خايفة منه، خلاص بدأ يتنفذ!
قانون الإيجار القديم بيتغير رسميًا، واللجان نزلت الشوارع، والأسعار القديمة اللي كانت بجنيهات قليلة.. بقت بتتحسب بعشرات الأضعاف.
بس السؤال: هل كل الناس هتدفع الزيادات دي؟ ومين ليه الحق في شقة بديلة بألف جنيه بس؟ ومين الحكومة قالتله "لأ"؟
كل التفاصيل الجديدة هنحكيها في التقرير ده خطوة بخطوة، وبالورق المطلوب كمان.
وزارة الإسكان بدأت فعليا تنفيذ أول مراحل تطبيق قانون الإيجار القديم الجديد، بعد ما اللجان الميدانية نزلت تراجع وتحصر الشقق الخاضعة للقانون، وتبدأ تصنيف المناطق على حسب المستوى والمعيشة.
المهندس شريف الشربيني، وزير الإسكان، قال في تصريحات تليفزيونية إن الملف بقى رسميًا ضمن أولويات الدولة، وإن عملية تصنيف المناطق بدأت فعلاً، وبيتم حالياً تحديد القيمة الإيجارية الجديدة حسب موقع كل منطقة ومستوى المرافق والخدمات فيها.
واللجان دي هتقسم المناطق لثلاث فئات:
مناطق متميزة: الزيادة فيها هتوصل لـ 20 ضعف الإيجار الحالي، والحد الأدنى للإيجار 1000 جنيه.
مناطق متوسطة: الزيادة هتكون فيها 10 أضعاف، والحد الأدنى 400 جنيه.
مناطق شعبية (اقتصادية): الزيادة فيها هتكون 5 أضعاف، والحد الأدنى 250 جنيه.
يعني مثلًا لو كنت بتدفع 50 جنيه في شقة بمكان متميز، بعد تطبيق القرار ممكن الإيجار يوصل لـ 1000 جنيه شهريًا!
وبحسب المصادر الرسمية، اللجان عندها 3 شهور لإنهاء عملها وتحديد القيم الجديدة، والمواعيد ممكن تتجدد مرة واحدة فقط بقرار من مجلس الوزراء، بعد كده المحافظ يعتمد النتائج رسميًا، ويتم نشرها في الجريدة الرسمية عشان يبدأ التطبيق.
وفي نفس الوقت، وزارة الإسكان بدأت تستقبل طلبات الحصول على وحدات بديلة للمستأجرين اللي بينطبق عليهم القانون، وده يا إما من خلال المنصة الإلكترونية الموحدة أو مكاتب البريد في كل المحافظات.
لكن الشرط الأساسي إن اللي يقدم لازم يكون المستأجر الأصلي أو اللي العقد امتد ليه قانونًا .. زي الزوج أو الأبناء اللي عايشين في نفس الشقة قبل تطبيق القانون .. بس مدة التقديم 3 شهور، وبعدها الطلبات هتتقفل.
أما عن الأوراق المطلوبة، فهي كالآتي:
نموذج التقديم المخصص.
صورة عقد الإيجار القديم.
ما يثبت استمرار العلاقة الإيجارية.
إقرار رسمي بتسليم الشقة القديمة بعد استلام البديلة.
صورة بطاقة الرقم القومي للمستأجر الأصلي والزوج أو الزوجة.
شهادات ميلاد أو بطايق الأولاد.
مستندات الحالة الاجتماعية (زواج – طلاق – وفاة).
وبالنسبة لذوي الهمم: شهادة التأهيل أو بطاقة الخدمات الحكومية.
أما الحالة الوحيدة اللي تمنع المستأجر من الحصول على شقة بديلة فهي عدم تسليم الشقة القديمة أو ثبوت إن المستأجر مش هو المقيم الفعلي فيها.
في النهاية، قانون الإيجار القديم دخل مرحلة التنفيذ الجدي بعد سنين من الجدل، بين ناس شايفة إنه "إنصاف للمالك" وناس تانية شايفة إنه “ظلم للمستأجر”.
