توجيه عاجل من الحكومة لخفض الدين العام.. زيادة 15% في صادرات مصر إلى روسيا.. استثمارات مليارية من كوريا الجنوبية في مصر
منصات بانكير قدمت النهاردة عدد من التقارير والتحليلات الخاصة في الشأن الاقتصادي والمالي المصري، البداية بتقرير عن توجيه عاجل من الحكومة لخفض الدين العام.
قال التقرير، إن مصر أعلنت إنها هتحدد سقف للاستثمارات العامة في السنة المالية الجديدة عند 1.16 تريليون جنيه، والقرار ده معمول عشان الحكومة تقدر تسيطر على الدين العام وتقلل من عجز الموازنة، وفي نفس الوقت تحافظ على استقرار الاقتصاد.. والموضوع ده مش مجرد تقليل إنفاق، لكن كمان تركيز على إن القطاع الخاص يدخل بقوة في النشاط الاقتصادي، سواء من خلال استثمارات مباشرة أو من خلال الاستفادة من بيع بعض أصول الدولة.
واستعرض تقرير بانكير، تصريحات الدكتورة رانيا المشاط وزيرة التخطيط، واللي وضحت أن الموضوع مش مجرد تقليل إنفاق، لكن كمان تركيز على إن القطاع الخاص يدخل بقوة في النشاط الاقتصادي، سواء من خلال استثمارات مباشرة أو من خلال الاستفادة من بيع بعض أصول الدولة.. كمان قالت إن فيه شراكة قوية مع البنك الدولي ومؤسساته، عشان يدعموا الإصلاحات المالية والهيكلية، بجانب التوسع في مشروعات التحول الأخضر والاقتصاد المستدام. وده كله داخل في إطار "السردية الوطنية للتنمية الاقتصادية" اللي الحكومة أطلقتها مؤخرًا.
وأوضح التقرير، أن السردية دي ببساطة هدفها إنها تربط رؤية مصر 2030 ببرنامج عمل الحكومة، وتوجه الدولة ناحية القطاعات الإنتاجية الحقيقية زي الصناعة والطاقة والتجارة، عشان نزود مواردنا الذاتية ونحقق نمو مستدام من غير ما نعتمد طول الوقت على الاستدانة.. ولو نفتكر، مصر خلال السنين اللي فاتت ضخت استثمارات كبيرة في البنية التحتية من طرق ومواني وطاقة ونقل ذكي، وده اللي خلانا دلوقتي قادرين نمشي بخط ثابت حتى مع الأزمات العالمية.
منصات بانكير قدمت تقرير مختلف النهاردة عن زيادة 15% في صادرات مصر إلى روسيا.
قال التقرير، إن مصر دلوقتي مركزة على زيادة صادراتها الزراعية لروسيا بنسبة 15%، وده لأن السوق الروسي بيعتمد بشكل كبير على المنتجات المصرية، لأن العلاقة بين البلدين أصلاً قوية، وزادت أكتر بعد دخول مصر لتكتل البريكس، وكمان في مشاورات إن التعاملات تبقى بالعملة المحلية بدل الدولار.
وأضاف التقرير، أن أبرز المنتجات اللي مصر بتصدرها لروسيا البطاطس، اللي السنة اللي فاتت صادراتها ارتفعت لأكتر من نص مليون طن مقارنة بحوالي 200 ألف طن قبلها، غير كده، الموالح زي البرتقال واليوسفي ليهم وضع خاص جدًا هناك، ومعاهم البصل والثوم والجزر والخضار المجمد والعصاير، وكلها عليها طلب عالي في السوق الروسي.
وأوضح التقرير، أن مصر هتزود صادراتها لروسيا، عن طريق أنها بتجهز خط ملاحي جديد من ميناء الدخيلة للموانئ الروسية مخصص لنقل الحاصلات الزراعية، عشان يوصل المنتج أسرع ويحافظ على جودته، ده شبه اللي حصل قبل كده في خط الرورو اللي ساعد في زيادة الصادرات لإيطاليا وأوروبا.. كمان تم تبسيط إجراءات الحجر الزراعي وتقليل الموافقات، وده خلّى التصدير أسرع وأقل تعقيد، غير كده، في اهتمام كبير بتحسين التعبئة والتغليف والتبريد أثناء النقل، لأن الجودة وقت وصول المنتج للسوق الروسي عامل مهم جدًا.
وحدة أبحاث بانكير قدمت تقرير خاص النهاردة عن استثمارات مليارية من كوريا الجنوبية في مصر
قال تقرير بانكير، إن كوريا الجنوبية ناوية تدخل استثمارات جديدة بمليارات الدولارات في مصر، وده جاي بعد مذكرة التفاهم اللي اتوقعت بين الوكالة المصرية للشراكة من أجل التنمية والوكالة الكورية للتعاون الدولي.. الفكرة إن كوريا شايفة مصر بوابة قوية لأفريقيا وأوروبا، وعايزة تستغل ده عشان توسع صادراتها وتفتح أسواق جديدة.
وأضاف التقرير، أن أهم المجالات اللي كوريا مستهدفاها قطاع السيارات وقطع الغيار، خصوصًا مع الطلب الكبير جوه مصر وبره على السيارات ومكوناتها، وكمان في تركيز على السيارات الكهربائية اللي عليها طلب عالمي دلوقتي، غير كده، في اهتمام بالبتروكيماويات والطاقة والبترول، ووفود من شركات كورية كبرى زارت مصر بالفعل عشان تبحث فرص الاستثمار هناك.
وأكد التقرير، أن قطاع الدواء برضه على رادار كوريا الجنوبية، ومع التطوير اللي حصل للبنية التحتية الصحية في مصر، في فرص إن الإنتاج يتصدر للأسواق الإفريقية اللي تعتبر سوق واعد جدًا، خصوصًا مع ضعف البنية الصحية في دول كتير بالقارة.. كمان في مجالات تانية زي التكنولوجيا والتحول الرقمي والذكاء الاصطناعي، واللي كوريا معروفة بتفوقها فيهم، وده ممكن يفتح مجالات تعاون جديدة جدًا.
