تحول مصر لمركز صناعي إقليمي في ألواح الصاج.. مصدر جديد لربح ملايين الدولارات
مصر ناوية تتحول لمركز صناعي إقليمي في صناعة ألواح الصاج.. بس يا ترى ده هيقلل فاتورة الاستيراد بتاعتنا؟.. وهل ده هيساعد مصر أنها تفتح أسواق جديدة وتشغل آلاف الشباب؟.. وهل دخول مصر مجال التصدير في الصاج هيديها مكانة إقليمية محترمة وسط دول المنطقة؟
مصر ماشية دلوقتي بخطة كبيرة عشان تبقى مركز صناعي إقليمي، وواحدة من أهم الصناعات اللي واخدة دعم وتركيز جامد هي صناعة ألواح ولفائف الصاج.
طيب ليه الصاج بالذات؟، لأنه أساسي في صناعات كتير جداً حوالينا، من أول التلاجات والغسالات والتكييفات، لحد هياكل العربيات والأتوبيسات والمقطورات، وكمان الأثاث المعدني والأجهزة الطبية، ده غير أنه داخل كمان في صناعات المعدات الزراعية وعلب الأكل والشُرب المعدنية، وحتى الأسقف والهياكل المعدنية بتاعة المصانع، يعني باختصار، من غير الصاج الصناعات دي كلها تتأثر.
وزارة الصناعة عندها رؤية واضحة، أنها توسع في إنتاج الصاج محليًا عشان نلبي احتياجات السوق الداخلي ونصدر الفائض برا، وده معناه حاجتين مهمين، أننا نقلل فاتورة الاستيراد اللي بتستنزف العملة الصعبة ونزود صادراتنا ونفتح أسواق جديدة للمنتجات المصرية.
طيب الحكومة بتعمل إيه؟
الحكومة أعلنت حزمة حوافز استثمارية جديدة مخصوصة للمستثمرين اللي عايزين يدخلوا في مجال الصاج.. الحوافز دي فيها أسعار تنافسية للأراضي الصناعية وتسهيلات كبيرة في الدفع، وقروض ميسرة لتمويل خطوط الإنتاج، ورخص تشغيل بتطلع في 24 ساعة بس بعد ما تجهز ورقك، كمان الحكومة موفرة المرافق كلها فورًا واللي هي كهرباء، ميه وغاز وطرق واتصالات
وفيه نقطة تانية مهمة، أن مصانع الصاج المحلي هتاخد أولوية توريد لاحتياجات المشروعات القومية، يعني المستثمر اللي يدخل المجال ده، ضامن تسويق جزء كبير من إنتاجه من أول يوم.
الفكرة مش بس مصانع جديدة، لكن الموضوع أكبر من كده، والحكومة عايزة تعمل منظومة كاملة حوالين الصاج وتبني قاعدة صناعية قوية تخلي مصر منافس إقليمي كبير، وده بيبان في التنسيق اللي حصل بين وزارة الصناعة وباقي الوزارات الاقتصادية، عشان يسهلوا الإجراءات ويزودوا القدرة التنافسية للمنتجات المصرية.
واللي يهمنا هنا أن التحرك ده هيفتح فرص شغل جديدة للشباب، وهيزود القيمة المضافة للمنتجات بتاعتنا بدل ما نفضل نعتمد على الاستيراد، ده غير أن دخول مصر مجال التصدير في الصاج هيديها مكانة إقليمية محترمة وسط دول المنطقة.
بالمختصر، الموضوع مش مجرد دعم صناعة، دي استراتيجية دولة عشان تثبت شعار "صُنع في مصر" كعلامة للجودة والريادة، وتخلي الصناعات الاستراتيجية دي من الأعمدة اللي يقوم عليها الاقتصاد الوطني.
