الجنيه يسترد عرشه.. العملة المصرية تحقق أفضل أداء في 2025
يا ترى إيه اللي بيحصل في سوق صرف العملات الأجنبية ؟ وايه سر صعود الجنيه المصري في 2025 ؟و هل الصعود ده موجة مؤقتة ولا فيه سر ورا القصة دي؟
الدولار اللي كان بـ٧٠ جنيه.. بقى النهاردة سعره في حدود 48 جنيه لكن إيه العوامل اللي ساعدت على المعجزة دي هل هو دور الحكومة بس ولا فيه عوامل تانية.
القصة يا جماعة مش سحر ولا خيال ولا حتى صدفة.. القصة عبارة عن خطوات مدروسة وجهود حقيقية بدأت تأتي ثمارها أول وأهم عامل في عودة الجنيه، هو إدارة سعر الصرف بمرونة. زمان، البنك المركزي كان بيحاول يثبت سعر الجنيه بشكل مصطنع، وده كان بيخلق سوق سوداء شرسة. لكن في الفترة الأخيرة، سمحوا للسوق هي اللي تحدد السعر الحقيقي، وده اللي خلى المضاربات تقل بشكل كبير. الدولار بقى متاح في البنوك، مفيش داعي إن التجار يروحوا للسوق السوداء.
ثاني عامل، وهو التدفقات الدولارية الضخمة. مصر في 2025 شافت استثمارات غير مسبوقة. مشروع رأس الحكمة كان ضربة معلم، وسبب في دخول مليارات الدولارات في خزينة الدولة. وده مش بس كده، الاستثمار في الطاقة المتجددة والهيدروجين الأخضر زاد بشكل ملحوظ، وده جلب سيولة دولارية جديدة. كمان، تحويلات المصريين في الخارج رجعت تزيد تاني بعد ما كانت قلت بسبب الفروق الكبيرة في الأسعار.
موضوع السياسات النقدية الصارمة كان ليه دور كبير برضه. البنك المركزي رفع سعر الفائدة بشكل قوي عشان يلم السيولة اللي في السوق ويقلل التضخم. دي خطوة ممكن تكون صعبة في الأول، بس كانت ضرورية. لما الفائدة بتزيد، الناس بتشجع إنها تحط فلوسها في البنوك بدل ما تشتري بيها سلع، وده بيقلل الطلب، وبالتالي الأسعار بتنزل.
كمان، لازم نتكلم عن التعاون مع المؤسسات الدولية. مصر نجحت إنها توصل لاتفاقيات جديدة مع صندوق النقد الدولي والبنك الدولي، وده مش بس بيوفر قروض بفايدة قليلة، ده كمان بيعتبر شهادة ثقة من المؤسسات العالمية دي، وده بيشجع المستثمرين الأجانب إنهم يجوا مصر وهما مطمنين.
بس استنوا، هل الجنيه رجع لوحده؟
لأ طبعًا. فيه عوامل تانية كتير ساعدت. زي زيادة الإنتاج المحلي والصادرات. الحكومة بدأت تركز على دعم الصناعات المحلية وتشجيع التصدير، وده بيوفر دولار أكتر وبيقلل فاتورة الاستيراد. لما بتصنع منتج محلي بدل ما تستورده، انت كده بتوفر دولار. ولما بتصدر منتج للخارج، انت كده بتجيب دولار.
ونقدر نقول إن الاستقرار السياسي والأمني كان له دور مهم جدًا. مفيش مستثمر بيجي بلد مش مستقرة. مصر في 2025 بقت بتوفر بيئة آمنة للمستثمرين، وده شجعهم إنهم يضخوا فلوسهم في مشاريع طويلة الأجل.
