صعيد مصر يدخل عصر الـ”ميجا بروجكتس”.. كنز دولارات من الرياح
يا ترى الصعيد أخيرًا هياخد مكانته اللي يستحقها على خريطة التنمية ولا لسه الطريق طويل؟، وهل المشروعات دي هتخلي شباب الصعيد يلاقوا شغل جوه بلدهم؟.. وهل الصعيد ممكن يبقى العاصمة الجديدة للطاقة في مصر؟..
احنا دلوقتي في صعيد مصر، الأرض اللي كانت منبع الحضارة وأصل التاريخ، ولكن للأسف كانت لسنوات طويلة بعيدة عن الاهتمام.. كان الصعيد في نظر كتير زي أرض مهمشة، رغم أنه كان في قلب الحضارة المصرية القديمة، وكانت كل العيون دايمًا بتتجه للقاهرة والمدن الكبرى.. لكن النهاردة، الصورة بقت مختلفة تمامًا.. النهاردة، الصعيد أصبح قلب التنمية الاقتصادية، ومركز للطاقة المتجددة.
في قلب الصعيد، وبالتحديد في نجع حمادي بقنا، فيه مشروع "محطة أوبيليسك الشمسية" اللي هتكون واحدة من أكبر محطات الطاقة المتجددة في مصر، واللي هتولد حوالي 1100 ميجاوات من الطاقة، والمميز فيها إنها مرتبطة بنظام لتخزين الطاقة عشان تضمن استقرار الكهرباء في الأوقات اللي الشمس بتقل فيها.. واستثماراته حوالي 600 مليون دولار، ومن المتوقع أن يبدأ التشغيل في 2026.
كمان في غرب سوهاج، فيه مشروع طاقة رياح ضخم تحت اسم "مشروع خماسين" اللي هيضم أربع محطات طاقة رياح من أهم الشركات العالمية، وهيعمل قدرة إنتاجية تصل لـ28 جيجاوات، باستثمارات حوالي 30 مليار دولار، وهيعزز مشروعات التنمية في المنطقة ويخلق فرص عمل كثيرة.
أما بالنسبة للنقل، فيه شبكة قطارات سريعة هتربط الجيزة بأسوان، وهتكون بمثابة شريان حيوي للتنمية.. الخط الأزرق للقطار السريع هيمتد على حوالي 1400 كيلومتر، وهيصل بين المدن الكبرى في الصعيد ويمر بـ36 محطة، ده غير إنه هيساهم في ربط معابد أبو سمبل وأهرامات الجيزة، وهيخلي حركة السياحة أفضل بكتير.
في البحر الأحمر، فيه مشروع ضخم اسمه "مراسي ريد"، اللي بيقع غرب الغردقة، واللي هيكون وجهة سياحية عالمية، واللي ده هيوفر 170 ألف فرصة عمل مباشرة.
ومن ناحية الزراعة، فيه مشروع "توشكى الخير" اللي بيهدف لاستصلاح مليون فدان في قلب الصحراء الغربية، وده هيساهم بشكل كبير في تعزيز الأمن الغذائي لمصر، واللي بيضم أكبر مزرعة تمور في العالم، وده بيخلي صعيد مصر سلة غذاء استراتيجية.
وبالنسبة للطاقة الشمسية، فيه مشروعات ضخمة زي "مجمع بنبان للطاقة الشمسية" في أسوان، اللي يعتبر من أكبر المشاريع في العالم للطاقة الشمسية، ده غير محطة "أبيدوس" اللي هتساهم في توليد 1500 ميجاوات من الطاقة النظيفة.. مش بس وكده، ده فيه المشروع العملاق "محطة بحيرة ناصر الشمسية" اللي هتكون أكبر محطة شمسية عائمة في العالم.
أما في أسيوط، فيه مشروع "مجمع أنوبك" لتكرير البترول، اللي هيحقق قفزة في تلبية احتياجات السوق المحلية من المنتجات البترولية، ويقلل الاعتماد على الاستيراد
أما "مشروع شرق العوينات" بالوادي الجديد، هيكون واحد من أكبر المشروعات الزراعية في الصعيد، واللي هيساهم في استصلاح 220 ألف فدان، وهينتج محاصيل استراتيجية زي القمح والشعير.. مش بس وكده، كمان فيه مشروع "المثلث الذهبي" للتعدين والصناعة بين قنا وسفاجا هيساهم في استغلال الثروات المعدنية في المنطقة وتحويلها لصناعات متكاملة.
وكمان فيه مشروع "سنابل سونو" في أسوان، اللي بيهدف لاستصلاح 850 ألف فدان على مراحل، وده هيحسن الإنتاج الزراعي بشكل كبير ويدعم الاقتصاد المحلي.
كل المشروعات دي بتأكد أن صعيد مصر مش بس أرض تاريخية، دي كمان أرض المستقبل اللي فيها فرص كبيرة في مجالات متعددة زي الطاقة المتجددة والنقل السريع والسياحة، والزراعة، وكل ده هيساهم في تحول الصعيد لواحدة من أهم المناطق الاقتصادية في مصر والعالم.
