ليلة صعبة في سوق الدهب.. عيار 21 كسر حاجز الـ 5 آلاف جنيه لأول مرة في تاريخه
يا ترى ايه اللي بيحصل في سوق الدهب؟ وليه سعر الجرام عيار 21 كسر حاجز ال 5 الاف لأول مرة في تاريخه؟ ايه اللى وصل الأسعار لكده ؟ وتوقعات الأيام الجاية بتقول ايه هى الدهب هيفضل فى ارتفاع ولا ممكن الأمور تهدا شوية؟
لأول مرة في تاريخه.. جرام الدهب عيار 21 كسر حاجز الـ5000 جنيه.. ووصل لمستوى قياسي.. الارتفاع ده مش صدفة.. هو نتيجة موجة عالمية وصل فيها سعر الأوقية لـ3700 دولار.. وده رقم محصلش قبل كده.
اللي بيحصل في السوق المحلي هو انعكاس مباشر للي بيحصل في السوق العالمي.. الدهب العالمي حقق مكاسب ضخمة.. زادت عن 40% من بداية السنة.. وده طبعاً أثر بقوة على سوق الدهب في مصر.
حد ممكن يسأل ويقول .. إيه اللي وصل الأسعار لكده؟
فيه أسباب كتير للى بيحصل في سوق الدهب حاليا أولها.. ان العالم كله دلوقتي بيحبس أنفاسه قبل اجتماع الفيدرالي الأمريكي.. اللي متوقع فيه وبنسبة شبه مؤكدة إنه هيخفض سعر الفايدة.. خفض الفايدة ده بيخلي الدولار ضعيف.. والاستثمار في الدهب أكتر جاذبية.
كمان العملة الأمريكية وصلت لأدنى مستوياتها في آخر شهرين.. العلاقة بين الدهب والدولار عكسية.. يعني لما الدولار بيضعف.. الدهب بيقوى.. والعكس صحيح.
و حتى قبل قرار الفيدرالي.. كان فيه ضغط كبير عليه من شخصيات سياسية مهمة.. وده خلى الأسواق تستبق القرار.. وتتوقع خفض أكبر للفايدة.. واللي طبعاً أثر على سعر الدهب.
وحاليا فيه بيانات بتقول إن المستثمرين بيضخوا فلوسهم في صناديق الاستثمار المدعومة بالدهب للأسبوع التالت على التوالي.. وده بيأكد إن الدهب بقى الملاذ الآمن الأول للمستثمرين في الفترة دي.. وكل ما الطلب بيزيد.. السعر بيزيد.
طب إيه تأثير ده على السوق المصري؟
في مصر.. سعر الدهب المحلي بقى بيعتمد أكتر على السعر العالمي.. وده بسبب استقرار سعر صرف الجنيه قصاد الدولار في البنوك.. الارتفاعات التاريخية اللي بتحصل عالميا.. بتنعكس على طول على السعر المحلي.
عيار 21.. اللي هو الأكثر تداولاً في مصر.. فتح تعاملات النهاردة عند 4960 جنيه للجرام.. ووصل حالياً لـ4965 جنيه للجرام.. بعد ما كان قفل إمبارح عند 4945 جنيه.. تجاوز سعر 4900 جنيه كان ليه زخم كبير.. وده اللي خلاه يكسر حاجز الـ5000 جنيه لأول مرة في تاريخه.
نيجي للسؤال المهم .. هل الدهب هيفضل في ارتفاع؟
الاجابة على السؤال ده مرتبطة مباشرة بقرار الفيدرالي الأمريكي..
لو الفيدرالي خفض الفايدة.. الدهب مرشح لمواصلة الصعود لمستويات تاريخية جديدة.. خصوصاً لو البنك أظهر إنه منفتح على خفض تاني في الشهور اللي جاية.
لو الفيدرالي اتخذ لهجة حذرة.. الدهب ممكن يدخل في حركة تصحيحية طبيعية.. وينزل شوية بعد موجة الصعود الكبيرة دي.
وخد بالك اللي بيحصل في سوق الدهب ده مش مجرد ارتفاع أسعار.. ده انعكاس لحالة اقتصادية عالمية.. و الدهب هو اللي بيدينا إشارة ليها.
