مفاجأة غير متوقعة من الفيدرالي ممكن تقلب الموازين.. إيه اللي هيحصل النهاردة في واشنطن؟
هل ممكن الفيدرالي الأمريكي يفاجئ الأسواق بقرار غير متوقع ؟ وايه اللى ممكن يحصل لو ما خفضتش الفايدة على العملة الأمريكية زي ما ناس كتير بتتوقع؟ وايه تاثير ده على العالم كله سلبا وإيجابا؟
العالم كله على موعد مع اجتماع مهم جداً.. اجتماع الفيدرالي الأمريكي النهاردة.. واللي هيصدر فيه قرار مصيري بشأن سعر الفايدة.. بعد ما كان الفيدرالي ثبت سعر الفايدة لفترة طويلة.. دلوقتي كل التوقعات بتشير إنه هيخفضها.. وده هيحصل لأول مرة من فترة طويلة جدا.
طب إيه السيناريوهات المتوقعة؟
السيناريو الأول والأكثر ترجيحاً إن الفيدرالي هيخفض سعر الفايدة بمقدار ربع نقطة مئوية.. يعني 25 نقطة أساس.. وده السيناريو اللي أغلب المحللين والأسواق بتتوقعه.. وده بسبب إن معدلات التضخم في أمريكا بدأت تنزل.. وكمان فيه علامات على ضعف في سوق العمل الأمريكي.
السيناريو الثاني إن الفيدرالي هيخفض الفايدة بمقدار نص نقطة مئوية.. يعني 50 نقطة أساس.. الاحتمال ده ضعيف جداً.. لكنه موجود.. وده لو الفيدرالي قرر إنه يسرع وتيرة الخفض عشان يدعم الاقتصاد بشكل أقوى.. وده هيحصل لو البيانات الاقتصادية اللي هتظهر الفترة الجاية كانت أضعف من المتوقع.
أما السيناريو الثالث فهو إن الفيدرالي هيثبت سعر الفايدة.. الاحتمال ده بعيد جداً.. لإن أغلب المسؤولين في البنك أشاروا إلى إن الوقت مناسب للخفض.. لكنه ممكن يحصل لو ظهرت مفاجآت في بيانات التضخم أو سوق العمل قبل الاجتماع.
كل سيناريو من دول ليه تأثير مباشر على الدهب والدولار.. لأن العلاقة بينهم علاقة عكسية..فلو الفيدرالي خفض الفايدة الدهب سعره هيزيد لإن الفايدة المنخفضة بتخلي الاستثمار في السندات الحكومية والدولار أقل جاذبية.. فالمستثمرين بيجروا على الدهب كملاذ آمن.. وبيزيد الطلب عليه.. وبالتالي سعره بيزيد.
كمان الدولار سعره هينزل.. لإن خفض الفايدة بيقلل من جاذبية الدولار.. وبيخلي المستثمرين يبدلوا الدولار بعملات تانية أو يستثمروا في أصول تانية زي الدهب.
ولو حصل تثبيت الدهب سعره ممكن ينزل أو يستقر.. لإن تثبيت الفايدة بيخلي الدولار قوي.. وده بيضغط على سعر الدهب.. أما الدولار فسعره هيزيد.. لإن المستثمرين هيفضلوا محتفظين بالدولار.. لإن سعر الفايدة المرتفع بيقدم لهم عائد كويس.
الأسواق دلوقتي بتعيش حالة من عدم اليقين.. ده بسبب التوترات الجيوسياسية.. والديون الأمريكية.. والجدل حوالين استقلالية الفيدرالي.. كل ده بيخلي المستثمرين يروحوا للدهب كملاذ آمن.. وده اللي خلاه يحطم أرقام قياسية.. ويوصل لمستويات تاريخية في الفترة اللي فاتت.
ولازم تكون عارف .. قرار الفيدرالي ده مش قرار اقتصادي بس.. ده قرار سياسي واقتصادي في نفس الوقت.. هيحدد مستقبل أسواق المال.. و هياثر على جيب كل واحد فينا.. والدهب هو أول اللي هيتأثر.
