2100 زيادة في الطن.. قفزة مفاجئة في أسعار الحديد
النهارده حصلت مفاجأة كبيرة في سوق الحديد، أسعار الطن قفزت بشكل ملحوظ بعد قرار وزارة الاستثمار والتجارة الخارجية بفرض رسوم إغراق جديدة على خام البليت.
القرار اللي بدأ تطبيقه الخميس، بيقول إن أي واردات البيليت هتخضع لرسوم بنسبة 16.2%، وبحد أدنى 4613 جنيه للطن، وده قلب الموازين في سوق مواد البناء.
أول رد فعل جه من شركتين كبار:
المراكبي والجارحي، أعلنوا رفع أسعار حديد التسليح 2100 جنيه للطن مرة واحدة، والسعر دلوقتي عندهم بقى 37 ألف و500 جنيه تسليم أرض المصنع شامل الضريبة.
أما باقي الشركات، فالوضع كالتالي:
حديد عز: استقر عند 38 ألف و800 جنيه للطن.
بشاي: سجل 38 ألف و600 جنيه.
المصريين: 38 ألف و500 جنيه.
المراكبي والجارحي: 37 ألف و500 جنيه.
حديد عز، أكد إن مفيش نية لزيادة الأسعار حاليًا، حفاظًا على استقرار السوق، لكن شركات تانية فضّلت ترفع الأسعار فورًا عشان تغطي التكلفة الجديدة، بينما في مصانع لسه منتظرة تشوف التأثير على المدى القريب.
القرار ده مش هيقف عند مصانع الحديد بس، المطورين العقاريين والمقاولين حذروا إن زيادة أسعار الحديد هتأثر على تكلفة المشروعات السكنية اللي ممكن تعلى بنسبة 10%، وده معناه إن أسعار الشقق والوحدات هتعلى هي كمان.
