قطاع صناعي مصري يستحوذ على اهتمام عمالقة العالم.. إيه اللي بيحصل في صناعة الأسمدة؟
يا ترى إيه سر اهتمام 3 دول كبيرة زي الهند والصين وتركيا بقطاع الأسمدة في مصر؟ إيه اللي بيجذبهم في الأسمدة؟.. وليه القطاع ده بالذات هو اللي بيخطف أنظار المستثمرين الأجانب؟.. هل دي بداية لعهد جديد من التصنيع والإنتاج؟
قطاع الأسمدة في مصر بيشهد اهتمام كبير من المستثمرين الجانب وفيه خطط من دول كبيرة للمنافسة بقوة فى القطاع المهم والحيوي ده في مصر.
رئيس غرفة الصناعات الكيماوية أعلن إن فيه طلبات رسمية من شركات صينية وهندية وتركية لتنفيذ مشاريع ضخمة جداً في قطاع الأسمدة.. الطلبات دي دلوقتي بتستنى الموافقة النهائية من الحكومة عشان تدخل حيز التنفيذ.
طب إيه سر الجاذبية الرهيبة دي؟ وليه كل الدول دي مهتمة بالقطاع ده بالذات؟
الخبراء بيقولوا إن فيه أسباب واضحة جداً بتخلي مصر وجهة مثالية للمستثمرين في قطاع الأسمدة.. مصر عندها وفرة كبيرة جداً من المواد الخام اللي بتدخل في صناعة الأسمدة.. بننتج حوالي 12 مليون طن سنوياً.. منهم 8 مليون طن أسمدة نيتروجينية و4 مليون طن فوسفاتية.. ده بيضمن للمستثمر إن المواد الخام متوفرة وبتكلفة قليلة.
مقارنة بالدول التانية.. تكاليف الإنتاج في مصر منخفضة.. وده بيخلي المنتج النهائي سعره تنافسي جداً في السوق العالمي.
و الحكومة المصرية بتشتغل على زيادة الرقعة الزراعية لـ 13.5 مليون فدان في السنين اللي جاية.. وده معناه إن فيه طلب كبير جداً ومتزايد على الأسمدة جوه مصر.. يعني المصانع الجديدة هتضمن إن منتجاتها ليها سوق كبير ومضمون.
المستثمرين دول مش جايين عشان السوق المحلي بس.. ده فيه خطة كبيرة للتصدير.. مصر عندها اتفاقيات تجارية قوية جداً مع دول كتير في العالم.. وده بيخلي صادرات الأسمدة توصل للأسواق العالمية برسوم جمركية قليلة أو حتى بدون رسوم خالص.. وده بيفتح آفاق كبيرة للشركات دي.
الأرقام بتتكلم.. صادرات مصر من الكيماويات والأسمدة زادت 13% في النص الأول من السنة.. ووصلت لـ 4.6 مليار دولار.. وتركيا لوحدها كانت أكبر مستورد للمنتجات دي.. استوردت بـ 664 مليون دولار.. الأرقام دي بتطمن أي مستثمر إن منتجاته هتتباع وهتكسب.
مصر بتستورد حوالي مليون طن من أسمدة البوتاسيوم كل سنة.. الاستثمارات الجديدة دي هتوفر علينا كتير من الفلوس اللي بندفعها في الاستيراد.. وهتخلينا ننتج محلياً.. وده هيوفر علينا عملة صعبة.
اللي بيحصل ده مش مجرد استثمار.. ده تصويت بالثقة في مستقبل الاقتصاد المصري.. وجود شركات من 3 دول كبيرة زي الهند والصين وتركيا.. بيخلي العالم كله يبص على مصر كمركز رئيسي للصناعات الحيوية دي.
