زيادة جديدة في سعر صرف الجنيه المصري انخفاض الدولار الامريكي.. شوف إيه الحكاية
مصر علي معياد جديد لخفض سعر صرف الدولار، وده هيدي قوة جديدة لسعر صرف الجنية المصري .. ياتري اية سر انخفاض سعر صرف الدولار الأمريكي.. ومتوقع سعر صرف الدولار يوصل لكام.
خطوات مهمة جدا أخذتها الدولة المصرية علي مدار الشهور اللي فاتت للنهوض بالاقتصاد الوطني، وجذب الاستثمارات الأجنبية من الخارج، والتوسع في التحفيزات والتسهيلات اللي بتقدمها الحكومة لزيادة الاستثمارات في السوق المصري.
الخطوات اللي أخذتها الحكومة علي مستوي الاقتصاد كان لها تأثير مباشر في القوة اللي بدأت تظهر علي سعر صرف الجنية المصري، خصوصا أن الاقتصاد المصري مر بمراحل صعبة جدا، ولولا سياسيات الحكومة لإعادة بناء الاقتصاد المصري وفتح مصادر جديدة للدخل الدولاري من الخارج كانت الأمور هتكون في وضع اسوء من كده بكتير.
طيب اية حكاية الانخفاض الجديد في سعر الدولار في الوقت اللي جاي ؟.
البيانات الاقتصادية الأمريكية الأخيرة بتأكد أن في تباطؤ في سوق العمل، وتقرير الوظائف الشهري أكد أن في زيادة أقل من المتوقعة في عدد الوظائف، وده عزز التوقعات اللي بتأكد أن البنك الفيدرالي هيتجه إلى خفض سعر الفائدة في اجتماعاته اللي جاية، والتوقعات الموجودة حاليا أنه هيكون في خفض هيروح ما بين 25 الي 50 نقطة أساس لاجتماعات سبتمبر وديسمبر.
لازم تكون عارفين ان اي خفض لأسعار الفائدة دائما بتأدي إلى ضعف قوة الدولار عالميا، خصوصا لأن عوائد الاستثمار بالدولار بتقا، وده بيدفع المستثمرين للاتجاه إلى عملات وأسواق تانية يكون عوائدها أعلي، والدولار بدأ فعليا يظهر ضعف قدام سلة العملات العالمية، وده اللي انعكس علي الأسواق الناشئة والنامية زي مصر.
طيب اية تأثير قرار البنك الفيدرالي الأمريكي لخفض الفائدة علي السوق المصري .
طول الوقت اللي فات، والبنك المركزي المصري بيتعامل بحذر مع أي تغييرات في السياسة النقدية العالمية، وقرارات البنك الفيدرالي الأمريكي هيدي قوة جديدة للجنية المصري، وهيدي دفعة قوية لتحسن الاحتياطي النقدي ودخول تدفقات استثمارية جديدة للاقتصاد المصري وتحسن اضافي لقوة الجنية المصري .
كل التوقعات بتأكد أنه في حالة استمرار النمو الاقتصادي، فسعر الدولار هيواصل الانخفاض بنسب أكبر من كده بكتير، خصوصا أن سعر سعر صرف الجنية المصري متسعر بأقل من قيمته الحقيقية بما يتراوح من 10 الي 15% من قيمته الحقيقية، والقيمة العادلة للدولار حاليا المفروض تترواح ما 45 إلى 47 جنيه، وفي حالة صدور قرار جديد من البنك الفيدرالي الأمريكي بخفض الفائدة، فسعر صرف الدولار الأمريكي هينخفض ل 48 أو 49 جنية بالكتير.
التوقعات أكدت كمان أن الانخفاض في سعر صرف الدولار الأمريكي في السوق المصري مش هيكون بشكل لحظي، وهيكون بشكل تدريجي، ومعدل الانخفاض هيتوقف علي اكثر من حاجة اولها الإصلاحات الهيكلية اللي بتقوم بيها الحكومة، والتدفقات الدولارية في الناتج القومي المصري، ومدى التزام الحكومة بالمسار الإصلاحي اللي ماشيين عليه حاليا.
