الجنيه هيفضل قوي وأزمة الدولار انتهت.. 3 أسباب تخليك مطمئن على مستقبل العملة المصرية
ناس كتير بتسأل هو إزاي الجنيه لسه قوي بالرغم من كل قرارات خفض الفايدة اللي فاجأت السوق؟ وإزاي مؤسسات دولية كبيرة زي "بلومبرج" واثقة جداً في العملة المصرية؟ هل ده معناه إن مصر خلاص عبرت أزمة نقص الدولار؟
فيه تقرير حديث من "بلومبرج إنتليجنس" بيقول إن الجنيه المصري هيفضل قوي.. وده بسبب 3 أسباب رئيسية.
أول سبب.. هو إن الفايدة في مصر لسه عالية جداً.. لدرجة إنها بقت من أعلى الفوائد في الأسواق الناشئة.. وده بيخلي المستثمرين الأجانب يجروا على الاستثمار في الأصول المصرية.
السبب التاني.. هو إن فيه تدفقات قوية جداً من الأموال للمحافظ الاستثمارية في مصر.. وده بيدي ثقة كبيرة للسوق.. وبيساعد على استقرار الجنيه.
السبب التالت.. هو إن إيرادات مصر من الدولار بقت مستقرة جداً.. خصوصاً من تحويلات المصريين اللي عايشين برا.. وكمان من السياحة.
من فترة قريبة.. كان سعر الدولار بيطير كل يوم.. وكانت الفايدة بتزيد بشكل جنوني.. لكن دلوقتي.. البنك المركزي خفض الفايدة 2%.. وده بيأكد إن فيه ثقة كبيرة في قوة الجنيه.. وإن معدل التضخم بيقل بشكل كبير.
ووفقا للأرقام المعلنة معدل التضخم في يوليو اللي فات نزل لـ13.9%.. بعد ما كان 16.8% في مايو.. وده مؤشر قوي على إن الوضع الاقتصادي بيتحسن.
وبالرغم من إن إيرادات قناة السويس قلت.. إلا إن الحسابات الخارجية لمصر رجعت تاني.. وتحويلات المصريين في الخارج زادت بشكل كبير جداً.. وده ساعد على تعويض النقص ده,, كل ده خلى الجنيه المصري أقوى عملة أداءً في منطقة أوروبا والشرق الأوسط وإفريقيا.. وارتفع 2.2% قدام الدولار من نهاية يونيو اللي فات.
كل المؤشرات بتقول إن الجنيه المصري بيتحرك في الاتجاه الصح.. وإن أزمة نقص الدولار خلاص انتهت.. والبلد بتستعيد مكانتها.
