انتظروا قرار تاريخي.. فلوس بدل التموين.. هل هتنتهي أزمة السلع نهائيا؟
خلاص الحكومة قربت من خط النهائية وقريب قوي مش هيكون في بطاقة تموينية تاني.. ياتري اية حكاية الكلام ده.. وهل الدولة عايزة تقطع تموين المصريين.. وازاي الحكومة هتبيع العيش المدعم بعد القرار ده.
الدعم التمويني واحد من الخدمات المهمة جدا اللي بتقدمها الحكومة للمصريين خصوصا في الدعم المخصص لرغيف الخبز واللي لو حصل في اي حاجة هتحصل مشكلة عامة في الدولة كلها علشان كده الحكومة بتعتبر رغيف الخبز واحد من قضايا الأمن القومي اللي مش ممكن حد يقرب منها والتعامل في النقطة دي بالذات بيكون الشوكة والسكنية.
خلال الشهور اللي فاتت الحكومة اعتمدت خطة علشان تقنين تقديم الخدمات التموينية للمواطنين خصوصا أن الفحص اللي بتقوم بيه الحكومة اثبت أكثر من مرة أنه في ناس كتير غير مستحقين بيأخذوا دعم تمويني وان الدعم المخصص للسلع التموينية في أوقات كتيرة بيروح في غير مكانه المخصص له، علشان كده الدولة عملت خطة للتحول من دعم السلع التموينية الي الدعم النقدي.
طيب اية حكاية الدعم النقدي ده، وازاي الناس هتحصل عليه وهل الحكومة هتدي الناس فلوس بدل التموين ؟.
نظام التموين الجديد اللي الحكومة بدأت تنفذه في محافظة بورسعيد عبارة عن نظام بيقدم دعم نقدي مشروط من خلال كروت إلكترونية بدل من السلع التموينية، والهدف الأساسي من البرنامج ده هو مكافحة الفساد ورفع كفاءة الإنفاق وتحقيق العدالة الاجتماعية، وبكده البطاقات الجديدة مش هيكون عليها لا زيت ولا سكر والدعم النقدي للبطاقات هيتراوح من 500 إلى 1250 جنيه شهريا علي حسب عدد أفراد الأسرة في البطاقات.
طيب اية اللي خلي الحكومة تتجه لتطبيق النظام الجديد ده؟.
في أكثر من حاجة كانوا السبب الأساسي في خطة الدولة للتحول للدعم النقدي بدل من الدعم العيني واللي هو معروف عندنا باسم دعم السلع التموينية، واول الأهداف دي هيا تقليل الهدر والفساد، خصوصا أن دعم السلع بيعاني من تسربات، والتحول النقدي هيوفر الدعم مباشرة للمستحقين وهيخفض حلقات التسريب، ده غير انه هيضمن استمرارية الدعم ومرونة التوزيع، والدفع النقدي هيمكن المواطنين من أنهم يشتروا كل السلع اللي عايزينها بجودتها وسعر مناسب بدل ما هما متلزمين بسعر محدد.
الهدف الثالث للحكومة من خطة التحول الدعم النقدي هو ترشيد الإنفاق العام وخفض الضغط على الموازنة، خصوصا أن دعم السلع بيكلف الدولة مليارات الجنيهات سنويا، والدعم النقدي هيركز الدعم بدقة على للمستحقين، وهيهدف لضبط الاستهداف وتقنين الدعم خصوصا بعد الجهود الكبيرة اللي قامت بيها الدولة لتنقية قواعد البيانات، لضمان وصول الدعم النقدي للأسر المحتاجة فقط.
