500 مليون جنيه تمويل جديد للمشروعات الصغيرة والمتوسطة.. شوف إيه اللي هيحصل
إيه سر ضخ الحكومة ل 500 مليون جنيه كتمويل جديد للمشروعات الصغيرة والمتوسطة، هل ده عبارة عن دعم جديد للشباب، ولا فكرت اقتصادية هتدعم النمو بطريقة غير مباشرة؟
في خطوة جديدة لدعم المشروعات الصغيرة والمتوسطة، جهاز تنمية المشروعات وقع مع بنك القاهرة عقدين بقيمة نص مليار جنيه يعني 500 مليون جنيه، عشان يتم ضخ التمويل ده في مشروعات متناهية الصغر على مستوى كل محافظات الجمهورية.
ونقدر نقول، ان التمويل ده مش جاي كده وخلاص، ده عشان يساعد الشباب والسيدات وأصحاب المشروعات إنهم يوسعوا نشاطهم ويطوروا إنتاجهم، وكمان يقدروا يدخلوا أسواق جديدة محلية وخارجية.
واللي وقع العقدين كان محمد مدحت من جهاز المشروعات، وأيمن خطاب من بنك القاهرة بحضور قيادات الجهاز والبنك، واللي أكدوا إن الخطوة دي هتفتح مجالات شغل جديدة وتساهم في تحريك الاقتصاد.
ومن هنا، قال باسل رحمي الرئيس التنفيذي لجهاز المشروعات، ان الهدف الأساسي إن التمويل يوصل لأكبر شريحة من الفئات المستهدفة خاصة المرأة والشباب، وكمان هيساعد أصحاب المشروعات الصغيرة يدخلوا ضمن الاقتصاد الرسمي ويستفيدوا من كل التيسيرات اللي بتقدمها الدولة.
والمميز كمان، إن قيمة التمويل ممكن توصل لحد 500 ألف جنيه للمستفيد الواحد، وده معناه مرونة أكتر وأدوات تمويلية تناسب كل مشروع حسب احتياجاته سواء للتطوير أو التوسع.
ومن ناحية تانية، بهاء الشافعي نائب رئيس بنك القاهرة، أكد إن البنك عنده خبرة أكتر من 20 سنة في التمويل متناهي الصغر، والاتفاقيتين دول هيكملوا النجاحات اللي فاتت خاصة ان البنك ساهم قبل كده فى توفير 1.3 مليون فرصة عمل وبيخدم شريحة كبيرة من الشباب والمرأة المعيلة.
بردو، البنك ليه انتشار كبير في الصعيد واللي بيستحوذ على نص عملاء التمويل تقريبا، وده معناه إن التمويل هيغطي كل المحافظات بعدالة.
وفي المجمل، العقدين الجداد متوقعين يمولوا أكتر من 5300 مشروع متناهي الصغر، وده معناه فرص عمل جديدة وانتعاش للسوق المحلي وكمان دمج لعدد أكبر من المشروعات في الاقتصاد الرسمي.
