4 مليار جنيه دعم للفلاحين.. شركة سيارات عالمية تتوسع في مصر.. وهدوء في سوق الدهب
رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، 4 مليار جنيه دعم للفلاحين.. شركة سيارات عالمية تتوسع في مصر.. وهدوء في سوق الدهب.
والبداية من كواليس وزارة الصناعة.. المهندس خالد هاشم وزير الصناعة عقد اجتماع مهم جدا مع ممثلي شركة نيسان للسيارات برئاسة المهندس محمد عبد الصمد العضو المنتدب لشركة نيسان أفريقيا والهدف كان واضح وصريح وهو بحث خطط الشركة للتوسع في السوق المصري وفتح أبواب التصدير لأسواق أفريقيا.
الاجتماع شهد استعراض خطة الشركة لزيادة الإنتاج وتدريب العمالة بالتعاون مع مصلحة الكفاية الإنتاجية والتدريب المهني وجهات تانية والهدف إن نيسان تكون أكبر مصدر للسيارات للقارة السمراء خاصة إن الشركة نجحت في تصدير 25 ألف سيارة لأفريقيا خلال آخر 3 سنين ورفعت إنتاجها السنوي لـ 30 ألف سيارة ركوب في العام المالي الحالي وبقت في صدارة السوق المحلي.
والوزير أكد إن الدولة مهتمة جداً بتوطين صناعة السيارات والصناعات المغذية ليها عشان تقلل الاستيراد وتجذب الشركات العالمية للتصنيع في مصر خاصة مع النمو الملحوظ في عدد مصانع المكونات المحلية وزيادة استثماراتها الفترة الأخيرة.
ومن الصناعة نروح لوزارة المالية.. أحمد كجوك وزير المالية أعلن إن دعم الفلاح في فروق سعر القمح هيوصل لـ 4 مليارات جنيه ضمن حزمة الحماية الاجتماعية الجديدة اللي وجه بيها الرئيس السيسي ومستمرة معانا لنهاية العام المالي الحالي.
وأوضح إن الدولة هترفع سعر توريد أردب القمح من 2200 جنيه لـ 2350 جنيه بزيادة 150 جنيه للأردب والخطوة دي هدفها تخفيف الأعباء عن الفلاحين ومساعدتهم على مواجهة تكاليف الإنتاج اللي زادت.
والزيادة دي هتطبق على حوالي 4 مليون طن قمح مستهدفين الموسم الجاي والخزانة العامة هتتحمل التكلفة الإضافية والرسالة هنا واضحة وهي دعم المنتج المحلي وتشجيع زيادة المساحات المنزرعة عشان نقلل الاعتماد على الاستيراد ونوفر العملة الصعبة.
أما في سوق الصاغة فالوضع شهد حالة من الاستقرار في سعر جرام الذهب عيار 21 النهاردة، مع التعاملات الأسبوعية رغم إن الأوقية عالمياً انخفضت بنسبة 0.69% يعني حوالي 35 دولار وسجل عيار 21 النهاردة في مصر حوالي 6700 جنيه مع فرق بيع وشراء 30 جنيه وبالنسبة لباقي الأسعار فعير 24 سجل 7657 جنيه وعيار 18 وصل لـ 5743 جنيه والجنيه الذهب سجل 53 ألف و600 جنيه أما الأوقية فكانت بـ 238 ألف و133 جنيه.
والمهندس سعيد إمبابي أوضح إن عيار 21 زاد حوالي 35 جنيه الأسبوع اللي فات بعد ما بدأ التعاملات بـ 6675 جنيه وقفل على 6710 جنيه في وقت صعدت فيه الأوقية عالمياً من 4965 دولار لـ 5043 دولار
ونختم جولتنا بأسعار اللحوم.. أحمد جابر عضو مجلس إدارة الشعبة العامة للمصدرين أكد إن أسواق اللحوم في محافظة الجيزة مستقرة بشكل نسبي مع تنوع كبير في المعروض بين البلدي والمستورد والمجمد عشان يناسب كل الفئات.
وأوضح إن الأسعار في الشوادر اللي بالتنسيق مع وزارة الزراعة بتتراوح ما بين 280 و300 جنيه للكيلو حسب القطعية والمنطقة أما اللحوم السوداني والجيبوتي فأسعارها بين 300 و320 جنيه والكيلو المفروم منها بـ 280 جنيه مع توافر كميات كبيرة واللحوم المجمدة بتبدأ من 240 لحد 280 جنيه للكيلو حسب الجودة وفيه إقبال كبير عليها الفترة دي بسبب فرق السعر الواضح عن اللحوم البلدي وده بيخليها اختيار مناسب لشريحة كبيرة من المستهلكين.
