الجمعة 08 أغسطس 2025
رئيس التحرير
عمرو عامر
رئيس التحرير
عمرو عامر
اقتصاد مصر

الرسوم الأمريكية الجديدة تمنح مصر فرصة ذهبية في قطاع النسيج.. شوف القصة كاملة

الجمعة 08/أغسطس/2025 - 02:30 ص
صناعة الغزل والنسيج
صناعة الغزل والنسيج

يا ترى إزاي قرار أمريكا بفرض رسوم جمركية جديدة على واردات الملابس، ممكن يفتح باب رزق جديد لمصر، وايه اللي بيخلي المنتج المصري دلوقتي في وضع تنافسي أقوى من دول كبيرة؟.. 

دلوقتي، في موجة جديدة من القرارات الأمريكية، فرضت فيها واشنطن رسوم جمركية ضخمة على الملابس الجاهزة اللي بتيجي من دول كتير خاصة اللي بتيجي من آسيا زي بنجلادش وفيتنام بنسب وصلت ل ٥٤٪.

واللي حصل إن السوق الأمريكي اتلخبط، والمستوردين هناك بقوا يدوروا على بديل أرخص، مستقر وجودته كويسة، وهنا بتيجي مصر في الصورة.

وبكده نقدر نقول ان المنتج المصري رجع ينافس وبقوة، وده لان مصر مش ضمن الدول اللي طالتها الرسوم الأمريكية الجديدة، لأن الصادرات المصرية بقي ليها ميزة تنافسية قوية، يعني الأمريكي بدل ما يشتري من بلد هيدفع عليها ٥٠٪ جمارك، ليه ما يشتريش من مصر بسعر أقل وجودة قريبة أو حتى أحسن.

وده مش اي كلام، ده اللي أكده المهندس محمود غزال، عضو غرفة الصناعات النسيجية، اللي قال إن القرار ده فرصة ذهبية لازم نستغلها بسرعة، بس الفرصة دي مش هتيجي لوحدها لا دس محتاجة شغل.

يعنى احنا دلوقتي محتاجين دعم حكومي أكتر للصناعة وتسهيلات في التصدير وكمان دفع الشركات الصغيرة إنها تدخل معارض دولية، وده كله لازم يحصل بسرعة قبل ما المنافسين يصحوا من الصدمة ويعيدوا ترتيب أوراقهم.

كمان، أرقام التصدير بتقول إننا على الطريق الصح، لان في سنة ٢٠٢٤ صادرات مصر من الملابس الجاهزة لأمريكا وصلت لأكتر من مليار دولار، بزيادة ١٧٪ عن السنة اللي قبلها، ومع القرار الأمريكي الجديد فالنسبة دي ممكن تقفز لو عرفنا نستغل الفراغ اللي سابته الدول المنافسة.

وكل ده طبها معناه ان في مصانع أكتر هتشتغل وفرص عمل جديدة هتتفتح ودولارات هتخش البلد والصناعة هتتطور مش بس في التصدير لأ  دع كمان في السوق المحلي.

والخلاصة، هي ان الرسوم الأمريكية الجديدة مش أزموب بالنسبة لنا، لأ دي فرصة ذهبية لمصر تدخل بقوة سوق ضخم زي السوق الأمريكي، بس  لازم نتحرك بسرعة ونفكر بشكل إستراتيجي عشان نثبت للعالم إن "صنع في مصر" مش مجرد شعار ده واقع ممكن نعيشه.