بعد تنفيذ مبادرة خفض الأسعار.. شوف الحكومة ناوية على إيه تاني؟
يا ترى بعد ما الحكومة بدأت مبادرة خفض الأسعاإيه اللي ناوية تعمله تاني، هل المبادرة دي هتستمر واالتخفيضات دى فعلا حقيقية؟
من ساعات، ووزارة التموين بدأت تنفذ المرحلة الأولى من مبادرة خفض الأسعار في كل المجمعات الاستهلاكية على مستوى الجمهورية، يعنى في كل المحافظات تقدر تلاقي سلع أساسية بأسعار أقل بكتير من السوق.
والمفاجأة، هي ان السلع فعلا نزلت لحد 18% خصم، زي مثلا اللحمة والفراخ والسكر والزيت والرز المكرونة والشاي، يعني مثلا كلو اللحمة المجمدة بقى ب190 بدل 220، والفراخ المجمدة نزلت ل 90 بدل 110، والسكر بقى ب 28 بدل 30، وزيت الذرة بقى ب 95.5 بدل 107.5، ةكيلو المكرونة ب 23.5 بدل 25 جنيه، وفي كمان خصومات على المنظفات والعصاير وحتى منتجات العناية الشخصية بنسبة 5%.
لكن السؤال المهم… هل الحكومة هتكتفي بكده؟
وزير التموين شريف فاروق قال، ان اللي حصل ده مجرد بداية والمبادرة هتتوسع قريب وهتشمل سلع تانية كتير جدا، يعني لسه فيه موجات تخفيض جاية وده بالتعاون مع القطاع الخاص والسلاسل التجارية واتحاد الصناعات واتحاد الغرف التجارية.
ونفدر نقول ان الحكومة بتراهن دلوقتي على 3 حاجات، وهي زيادة المعروض في السوق، وكمان تشجيع التجار يقللوا هامش الربح بجانب تقليل حلقات التداول علشان السلعة توصل أرخص للمستهلك، يعني لو كله مشي صح، الأسعار مش بس هتنزل لأ ده كمان هتثبت على مستوى معقول لفترة طويلة.
وده مش بس عشان الأسعار ترخص، لا ده الحكومة شايفة إن ده جزء من شغلها لتحقيق توازن حقيقي في السوق من غير ما تتدخل في العرض والطلب ومن غير ما تقفل السوق على التجار.
والفكرة كلها إنك تقدر تشتري احتياجات بيتك بسعر عادل، وفي نفس الوقت السوق يفضل شغال من غير ما يحصل احتكار أو جشع.
والخلاصة هي، ان لو بتسأل نفسك تشتري إمتى، فاشتري دلوقتي خاصة لو من المجمعات الاستهلاكية أو المنافذ الرسمية واللي جاي ممكن يكون أحسن، لأن التخفيضات لسه مكملة والحكومة ناوية توسع المبادرة.
